(Aruba) Hendrik Croes, abogado y financiador di Movimento Electoral di Pueblo ta meti den escandalo miyonario

Un escandalo sumamente preocupante y cu repercusionnan hopi serio pa partido MEP ta hayando mas y mas forma cada dia cu ta pasa. E documentacion ta dunando indicacion di un conspiracion extenso envolviendo varios 100 mil florin den un tempo relativamente cortico. E documentacion cu DIARIO ta dispone di dje ta mustra cu aki ta papia di unicamente algun luna te cu maximo di un aña. Mas documento, cu ta relata na un temporada mas extenso ta den proceso di investigacion. Indicacionnan ta cu aki ta trata di un escandalo miyonario, caminda cu ta pasa placa di cuenta pa cuenta y entre diferente companianan. E placa aki ta wordo saca for di banco cash y e sumanan ta increibel y abogado di partido MEP, mr. Hendrik Croes ta envolucra den esaki.

Na e momentonan aki e abogado cu tin un trayectoria hopi largo, y hopi biaha hinca den casonan dudoso, ta mustra di ta envolvi manera nan ta bisa na Hulandes, “Diep, diep!” Patrosinador y financiador di MEP, mr. Hendrik Croes ta un di e facilitadornan den e caso miyonario aki. Aparentemente e abogado aki ta crea companianan pa asina por distribui placa pa esnan envolucra, sin cu ta cumpli cu proceduranan rekeri. Sumanan cuantioso cu ta deposita, despues ta wordo saca cu chequenan y tambe cash den tas of maleta.

No ta descarta cu tin mas hende envolucra den e asunto aki, pero na e momentonan aki ta conoci cu Palamentario Evelyn Wever-Croes a skibi checknan di sumanan cuantioso, saca for di un di e diferente companianan cu abogado Hendrik Croes ta facilita. E funcionario di Aeropuerto, complice den henter e escandalo aki, ta encarga pa saca sumannan grandi manera 40 mil florin cash den tas of maleta na un cantidad di ocasion.

Segun informacionnan fidedigno, ta mustra cu den seno di MEP, tin hopi frustracion pa e luz negativo cu abogado Hendrik Croes constantemente ta hinca e partido. Tin un grupo creciente di sostenedornan fiel cu ta kere cu aki e cos mester stop. Mayoria di e informacion cu DIARIO ta dispone di dje ta procedente for di e direccion ey. Hopi di nan ta culpa Hendrik Croes y su hendenan cu e partido a haya un derota atrobe den e ultimo eleccion aña pasa.

Pa locual ta e investigacion formal, ta mustra cu dentro di poco ta cuminsa un investigacion na procedencia di e placa, SoF (Source of Funds). Segun indicacion, esaki tambe ta algo sumanente dudoso. Semper ora cu tin pasamento di placa di cuenta pa cuenta, di compania pa compania, luz cora ta sende na entre otro MOT (Meldpunt Ongebruikelijke Transacties) y ta cuminsa sospecha inmediatamente di labamento di placa. No ta descarta cu aki tambe por tin envolucracion di cierto oficialnan cu ta tolera e tipo di transaccionnan aki pa motibo cu ta trata aki di Hendrik Croes.

Como Parlamentario y na vario ocasion, ora cu a confronta Parlamentario Wever-Croes cu e hecho cu e tin entradanan complementario na esun di Parlamento el a nenga esaki catergoricamente. Na e momentonan aki ta investigando tambe si na algun caminda el a declara di tin entradanan adicional. E indicacion fuerte ta cu esaki no ta e caso y por trece e instituto mas halto di pais Aruba den un situacion hopi bergonsoso na Aruba, pero tambe den Reino y internacionalmente.

FUENTE: http://www.diario.aw