(Aruba) Bluegreen a cera tur su operacion di benta y mercadeo y 42 hende a keda sin trabao

Riba Dialuna, Craig Robbins kende ta Vice-President di National Sales and Marketing pa Bluegreen Propierties NV, a splica na tur empleado cu nan mester a tuma e decision dificil pa cera e operacion di Benta y mercadeo na La Cabana Beach Resort and Casino na Aruba, y esaki desafortunadamente ta afecta 42 trabao. Tur empleo ta worde elimina.

Bluegreen Properties NV ta manehando un operacion di Benta y Mercado na Aruba desde 1999, enfocando riba e benta y mercadeo di unidadnan di Timeshare na La Cabana Beach & Racquet Club.

Nan a acerca Mediador di Gobierno y representantenan di Sindicato pa discuti e situacion actual. Tambe nan a reuni cu Ministro di Labor y a informa e Director di Departamento di Labor. Den un boletin oficial, nan a bisa cu nan lo sigui keda den contacto cu e empleadonan y traha cu nan door di e transicion dificil aki.

Bluegreen Properties NV lo sigui di tin un presencia na Aruba. Nan lo tin 2 Bluegreen Owner Represenative pa asisti e doñonan local di Bluegreen, y tambe e doñonan cu ta viaha pa Aruba via di nan Bluegreen ownership.

Nan ta gradici tur empleado pa nan trabao duro durante e añanan na La Cabana y semper lo balora e historia y relacionnan di trabao eynan.

FUENTE: http://www.diario.aw