Nengando di firma e presupuesto, gobernador Freddy Refunjol a ocasiona un debacle constitucional nunca antes experencia den Reino Hulandes. E organo consultativo a duna e opinion aki relaciona cu un investigacion haci pa trata presupuesto supletorio di 2014.
Segun conclusionnan di e utimo raport di RvA, Gobernador a haya consehonan incorecto. E consecuencia di no a firma e presupuesto a pone Aruba den un posicion delicado y a mina autoridad di Parlamento Arubiano pa por regla su mesun asuntonan.
E decisionnan cu gobernador a tuma, banda di a conduci na retiro di un Minister, a demostra cu gobierno di Hulanda, bou liderazgo di VVD, no ta mucho interesa den un Aruba liber pa haci su escohencianan interno. E conseho di RvA aki a duna Prome Minister Mike Eman rason tempo cu el a disidi di para pa locual e ta kere cu tabata un acto robes door di bay riba un welga di hamber.
E conclusion di Raad van Advies no ta uno cu ta mucho inespera, nan no ta e uniconan di opnion cu gobernador a tuma un decision inconstitucional na momento cu el a nenga di firma e presupuesto di pais Aruba.
Varios experto constitucional na Universidad di Aruba y Hulanda a vocifera nan opinion cu Gobierno di Hulanda no por duna Gobernador orden pa keda sin firma presupuesto di Pais Aruba. Entre e expertonan aki tin Viola van Bogaert y Luciano Milliard docentenan na Facultad di Ley na Universidad di Aruba, como tambe Rector Glenn Thode di UA y profesornan Arjen van Rijn di Rijksuniversiteit Groningen y Douwe Jan Elzinga di UNA.
Algo cu e raport ta menciona ta cu gobernador tabata tin e opcion di a manda e presupuesto di pais Aruba pa Hulanda pa e pasa den un proceso huridico pa vernietig e, pero a scoge pa no haci esaki. Conseho Consultativo di Aruba ta enfatisa cu no tabata responsabel pa gobernador a keda larga e debacle pa tanto tempo.
Kico lo pasa cu e conclusionnan aki ningun hende no sa ainda, pero cu e parti Caribense di Reino ta reina un descontento serio pa e manera cu gabinete Rutte y e minister encarga cu Reino a actua. Cu awo tin momentum pa sigui kibra constitucion di e manera aki lo tin di worde proba ainda, pero ta hopi bisto cu Hulanda ta haciendo cosnan mas dificil pa otronan, mientras cu nan mes lo no haci algo asina cu nan mes. Pone gobernador, como representante di Rey, den un stoel cayente asina, lo no por pasa nunca na Hulanda.
| FUENTE: http://www.diario.aw |
