E caso a wordo entama pa e grupo ‘Southwest’, cu ta inclui Southwest Hotel Development & Management N.V, Southwest Horeca Casino & Gaming Group N.V y Malmok Property Development.
Riba 20 di December 2011 Minister di Turismo a invita un grupo selecta, incluyendo Southwest, pa manda un carta di interes, pa haya e derecho di Erfpacht pa e tereno di ex Bushiri Hotel.
Riba 11 di April 2012 Southwest a haya e derecho pa e proyecto, pero Gobierno a pone algun punto cu ainda Southwest tabata tin cu cumpli cune, incluyendo cierto garantianan financiero.
Riba prome di September 2013 pais Aruba a cera un acuerdo cu Southwest Development pa desaroya e proyecto, cu lo mester bira un Hard Rock Hotel & Casino.
Gobierno a ricibi un carta di Southwest riba 30 di Mei 2014, unda cu Southwest ta pidi un prolongacion di 3 luna pa cuminza cu e proyecto.
Riba 19 di Juni pais Aruba a manda un carta pa Southwest indicando cu nan a ricibi e peticion di dia 30 di Mei y cu pais Aruba a ricibi e garantia di banco di AIB Bank di 2 miyon dollar, pa sigura cu e proyecto lo mester wordo ehecuta.
Gobierno a duna e prolongacion y a urgi Southwest pa purba cuminza cu e proyecto.
Riba 25 di Augustus 2014 un biaha mas Southwest a pidi un prolongacion di 3 luna y un biaha mas pais Aruba a duna esaki y na November ora cu un biaha mas Southwest a pidi pa prolongacion di 6 luna, Gobierno no a acepta esaki mas.
Gobierno a dicidi di kita e derecho di erfpacht di Southwest y cuminza busca un otro desaroyador pa e proyecto.
Door di esaki Southwest a cuminza e caso sumario pa pidi huez pa ordena pais Aruba pa duna un prolongacion mas di 6 luna y pa pidi huez pa ordena pais Aruba pa drenta den un acuerdo di erfpacht cu Southwest atrobe.
Southwest a pidi huez tambe pa no permiti Aruba mishi cu e 2 miyon florin di garantia cu AIB Bank tin riba su cuenta, te ora cu un posibel caso mas largo keda full cla, esta un asina yama ‘bodemprocedure’.
Pais Aruba a bringa esaki atravez di nan abogado Mr. R. Oomen y Diamars huez a duna su veredicto.
Huez a duna pais Aruba razon.
Huez a indica cu e hecho cu pais Aruba na diferente occasion a duna un prolongacion, no mester a duna Southwest e impresion cu nan por a keda sigui pidi pa prolongacion.
Segun e acuerdo entre Southwest y Gobierno, pais Aruba tabata tin tur su derecho cu para e acuerdo y busca otro desaroyador pa e proyecto, pensando tambe den bienestar di pais Aruba.
Huez a haya tambe cu si ta asina mes cu Southwest a inverti miyones di florin caba den e proyecto, cu ta algo cu pais Aruba ta nenga, asina mes Southwest no por haya razon den e caso aki, mirando cu e puntonan di nan acuerdo cu pais Aruba ta hopi cla.
Pues e grupo Southwest a perde e caso y tin cu paga tur e gastonan di corte.
| FUENTE: http://www.diario.aw |
