E secta na Hulanda ta wordo yama “Christelijke Gemeente Nederland” (CGN), y tin biaha nan ta yama e movimento como “Smiths Vrienden”, como cu te cu decada di 1990, e grupo no tabatin nomber oficial.
Algun dia pasa, prensa Hulandes a revela cu Rabo Bank na Hulanda a stop di haci negoshi cu Noorse broeders, despues cu nan a investiga e network danki na un tip encuanto fraude.
Prensa Hulandes a bisa cu Rabo Bank a indica cu nan ta kibra nan relacion comercial cu Noorse broeders. E banco kier stop cu financiamento y servicio bancario na e companianan, fundacionnan, y dirigente y ex-dirigentenan di e secta cristian aki. Esaki ta poni den documentonan cu e corant NRC na Hulanda a haya den nan man.
Awor cu Rabo Bank a tuma e decision ey, e infrastructura financiero di e grupo aki a bay plat na Hulanda. E ta un medida cu banconan regularmente sa tuma ora cu ta trata di organizacionnan criminal of sospechosonan di terorismo.
Na 2016, prensa Hulandes a divulga con e secta aki tabata haci su mes culpable di evadi impuesto, fraude, labor infantil, y violacion di leynan laboral di trabao. Tambe e lidernan ta haci nan mes rico via paraisonan di impuesto cu e placa cu 40.000 miembro rond mundo ta pagando. Di nan, como 2.000 ta biba na Hulanda.
Segun NRC, entre e Noorse broers na Hulanda, tin varios halto funcionario di Ministerionan y di servicio di Impuesto. NRC a identifica como “Prominente broeder”, Alfonso Boekhoudt kende aña pasa a wordo nombra door di kabinet como Gobernador di Aruba.
E corant no a duna nada specifico acerca. El a djis identifica Alfonso Boekhoudt como un miembro prominente di e secta.
Despues di e publicacionnan, Rabo Bank a haci investigacion y a descubri cu varios regla fiscal a wordo viola, aunke e instituto bancario no kier duna declaracion na prensa riba cuentanan individual di clientenan.
Pero ora di bay bek den pasado, na 2008 caba e banco ING na Hulanda no kier a haci negoshi cu Noorse broeders, debi na problemanan di compliance. Na Suiza tambe, UBS Bank a cera cuenta bancario di Noorse broeders na 2010, y mesun cos na 2013 cu Credit Suisse. Na aña 2014, Bank of Cyprus tambe a haci esey. Na 2015 a sigui cu Nordea Bank di Noruega. Demas banconan cu a nenga di traha cu Noorse broeders ta Piraeus Bank, Russian Commercial Bank, y Butterfield Bank (Bermuda).
E persona principal di e secta cu ta handle asunto financiero, esta Bernt Aksel Larsen di Noruega, a wordo sospecha pa Ministerio Publico di Hulanda di a comete falsificacion di documento.
Riba e potret por mira e Brunstad Conference Centrum di Noorse broeders.
FUENTE: https://www.diario.aw