jueves, 3 de agosto de 2017

(Aruba) Presidente di Merca ta pidi liberacion inmediato di presonan politico na Venezuela

Mirando e interes cu tin den nos pueblo di Aruba y sigur cerca e residentenan Venezolano den tur informacion tocante kico a sigui na e votacion pa un Constitucion nobo, crea pa Nicolas Maduro, DIARIO ta trece mas articulo relaciona cu e situacion den nos pais bisiña.

E Agencia di Prensa Frances ta referi na e reaccion di presidente di Merca, Donald Trump, tocante e situacion na Venezuela.

“Trump ta expresa cu e presidente di Venezuela Nicolas Maduro, ta “personalmente responsable” di e estado di salud y seguridad di e dos lidernan emblematico cu a wordo encarcela Diamars, Leopoldo Lopez y Antonio Ledezma. “Nan ta presonan politico ilegalmente encarcela pa e Regimen” Trump ta enfatiza den un comunicado di prensa difundi pa Cas Blanco.

“Merca ta condena e accionnan di e dictadura di Maduro” presidente Trump ta subraya. “E accion aki ta un prueba mas di e regimen autoritario di Maduro” el a acentua.

E comunicado ta sigui splica cu Lopez di 46 aña y Ledezma, Alcalde di Caracas, di 62 aña, tabata tin aresto domiciliario, y nan a worde deteni y saca for di nan cas door di agentenan di Servicio di Inteligencia den oranan di madruga.

E Tribunal di Justicia (TSJ) a acusa nan di planea nan fuga y haci yamadanan contra e eleccion di Diadomingo, impulsa pa Maduro, pa redacta un Constitucion nobo.

Oposicion no a participa considerando cu e Asamblea Constituyente sali for di e eleccion ta un mecanismo pa Maduro perpetua su mes den e poder.

“Nos ta reitera nos yamada na e liberacion inmediato e incondicional di tur preso politico” Trump a vocifera.

FUENTE: https://www.diario.aw