Diamars mainta a tuma lugar lanzamento di un campaña di pompnan di gasolin di CITGO cu ta cay bao di Aruba Gasoline Dealers Association. Durante un conferencia di prensa, director di pomp di gasolin di CITGO na Paradera Michael Profeet, kende ta alavez Secretario di Aruba Gasoline Dealers Association (AGDA), a trece dilanti cu ta un placer pa CITGO gas stations na Aruba pa uni nan mes cu CITGO corporate office pa un campaña asina importante.“Nos ta bay ta dunando bek na comunidad, na un fundacion asina importante cu ta Fundacion Arubano pa esnan Visualmente Incapacita (FAVI)”.
Esaki segun Profeet, kende ta representa tur e pompnan di gasolin di CITGO durante e conferencia di prensa.
“Nos ta spera cu pueblo completo sostene e campaña aki, sigui tank cerca nos, contribui cu un bon causa y sigui goza di e bon servicionan di CITGO”, segun Profeet.
Jim Cox di CITGO Petroleum Corporation tambe a hiba palabra y el a bisa cu no mucho despues di a pone e nomber di CITGO riba tur e pompnan di gasolin na Aruba, e compania tabata pensando con pa celebra esaki.
“Na prome instancia nos tabata pensando riba un apertura grandi of reapertura di e pompnan di gasolin, pero finalmente nos a bin cu e cos corecto”.
“Sin nos clientenan cu ta e Arubianonan cu ta bin pone gasolin y cumpra nos productonan, nos lo no tin un negoshi aki”.
“Pesey nos a dicidi di hasie un celebracion di aprecio na nos clientenan”, segun Cox.
El a sigui bisa cu e ta contento di ta parti di e celebracion aki.
