Den conferencia di prensa di gobierno, Dialuna cu a pasa, Minister di Asunto Social y tambe di e cartera di Labor, a expresa cu e desafio cu Aruba tin riba tereno social, no ta bay keda eynan.Esaki despues cu, como comunidad, nos a wordo sacudi pa locual a sosode cu dos rumannan Rishandro y Eugene, cruelmente asesina.
E sucedido aki ta e sintoma di e crisis social grave cu ta tumando lugar na Aruba. El expresa cu e “presser cooker social” a destapa y gobierno, obviamente, ta monitor e desaroyo cu ta sigui despues di e sucedido aki.
E mandatario a reitera cu esaki ta un señal di algo mas grave cu ta tumando lugar den henter nos comunidad tur dia. “Esey ta lo mas grave, cu tur dia nos ta confrontando abuso cu nos muchanan, contra hobennan, contra nos bieunan, contra hende muher y hende homber, y nos mester actua”.
Relaciona cu e caso di e dos hobencitonan menciona, e dignatario a señala cu inmediatamente gobierno a convoca un reunion cu tur instancia concerni cu ta cay bao di Departamento di Asunto Social, pa hunto cu gobierno bin cu un plan di emergencia, y esey tabata siman pasa.
E mandatario a subraya cu e plan aki ta di inmediato pero tambe na largo termino, pasobra e ta bay ta un bataya cu no ta bay caba ora cu e plan wordo ehecuta.
Un bataya cu nunca lo caba pasobra ta bay tin retonan nobo pa enfrenta, e dignatario a señala reiterando cu e caso di e dos hobencitonan ta un historia cu no mester lubida.
E siman aki mes e Departamentonan concerni, lo a entrega un plan di emergencia pa Gobierno di Aruba aproba su recomendacionnan, pa asina demostra como gobierno cu su meta primordial ta pone e ser humano central.
Minister Glenbert Croes a declara cu gobierno ta bay haci e inversion social pa implementa e plan di emergencia aki, pa combati y contraresta e fenomeno di abuso den tur amplitud di e palabra.
El a subraya cu no ta asina cu ta bay traha riba un aspecto so, pero riba tur e factornan manera problema di pobreza, aspecto financiero, e hecho cu tin famianan tin hamber, no tin awa, no tin coriente, no tin cas, tin problema di droga, alcohol, pues un serie di diferente problema cu ta hinca e famianan cu ta hinca den e crisis social aki. E mandatario a subraya cu e sector social ta bisa cu esaki ta un “epidemia nacional” y Gobierno a declara cu nos ta den crisis social, nacional.
El a subraya tambe a awe ta un dia di reflexion, cu motibo di e deramento di e dos angelitonan, y pa nos laga e bombiyo keda cendi den nos mente y nos curazon pa no baha guardia como comunidad, pais, gobierno y parlamento, pa actua hunto den cooperacion continuo. El a subraya cu e crisis social aki por hundi e futuro di nos pais si nos no actua awor.
FUENTE: Con información de https://www.diario.aw
