martes, 5 de diciembre de 2017

(Aruba) Gobierno di Aruba tin un deficit financiero di 155 miyon florin

Dialuna mainta a tuma lugar e conferencia di prensa convoca pa Gabinete Wever-Croes, cu presencia e biaha aki di Minister di Economia, Finanza y Cultura Xiomara Ruiz- Maduro; Minister di Asunto Social y Labor, sr. Glenbert Croes, y Minister Presidente Evelyn Wever-Croes.

Minister Ruiz-Maduro a inicia e conferencia di prensa, den cual a referi na e situacion financiero actual di nos pais, cual tin hopi hende den nos comunidad, pendiente di dje.

El a referi na e crisis nos finanzanan publico y e situacion con a haya e parti operacion di gobierno.

ANALISIS:

Ruiz-Maduro a duna di conoce cu gobierno a haci un analisis di cual el a duna informacion riba presupuesto no solamente di 2017 pero tocante e situacion pa 2018.

Encuanto presupuesto 2017, e dignatario a declara cu gobierno anterior a entrega caba e presupuesto supletorio cual ta mustra un deficit di 0 porciento, no obstante e informacion cu a sali afo, for di e analisis ta mustra cu esey no ta cuadra cu realidad.

E mandatario ta splica cu e realidad di e analisis ta mustra cu Aruba tin un deficit di 130 miyon florin pa loke ta 2017.

Ta trata aki di entradanan cu a keda atras: 50 miyon di winstbelasting, 7 miyon di invoerrechten cu tambe gobierno ta keda sin haya plus e situacion di e refineria unda cu gobierno a keda di ricibi placa cu tampoco nos pais ta bay haya.

Esaki a bin afo den combersacion cu banco cu a mustra esaki y cu ta nifica un buraco extra di 73 miyon florin.

PRESUPUESTO SUPLETORIO:

Relaciona cu e presupuesto supletorio cu na e momentonan aki ta den Parlamento, gobierno lo bin cu un nota di cambio pa asina por presenta e realidad financiero di nos pais, unda por mustra cu tin un deficit mas grandi.

E dignatario a splica tambe cu si tuma na cuenta e ley di supervision (caft) tin un norma premira cu pa 2017 mester a cera cu un deficit di 25 miyon, pero por mira aworaki por mira cu e ta core den 155 miyon na deficit.

CITGO ARUBA:

Minister Ruiz-Maduro a expresa cu esaki ta un situacion hopi serio y mester indica cu e gobierno anterior, door di caft a wordo bisa cu tabata tin un deficit extra y den e caso aki esun di 50 miyon. Caft a manifesta tambe su preocupacion riba e situacion di CITGO Aruba, riba e pregunta si Aruba ta haya e placa aki si of no. Na e momentonan aki e desaroyo no ta mustra diferente, segun e Titular di Finanza.

“E no ta mustra diferente na locual Caft a bin ta trece dilanti, kiermen cu tin un deficit extra, cu tin un problema cu RBA unda gobierno no ta bay haya e placa aki y aworaki e saldo ta mustra cu tin un buraco di 155 miyon florin”.

FUENTE: Con información de https://www.diario.aw