E idea cu tin cu tuma revancha, bin cu rencor pa hendenan cu ta di otro color politico ora tin cambio di gobierno, ta algo cu ex prome minister Mike Eman no a practica. Insistentemente, na momento cu AVP a drenta den gobernacion, nan a mustra cu, definitivamente, no lo tabata kier, unda cu ta persigui hende, den e caso aki trahadornan di sector publico.Por corda cu tabata tin hopi persona cu nombracion of contratonan hopi debil huridicamente, na diferente dienst, manera na Serlimar y DOW. Personanan cu tabata traha canto di caminda, na GKMB. Hopi caminda tabata tin persona cu contratonan cu por a termina.
Eman tabata hopi cla cu su coleganan minister, cu esey no ta bay sosode y cu no ta bay hiba e politica di persecucion politico. Por mira personanan cu diploma di HBO, personanan cu ta nombra na MFAnan, hendenan cualifica, cu tur diploma, cu tur preparacion cu a pasa DRH, y, por ehemplo, ora e cabes mes di DRH a wordo escogi como director di e departamento, sra. Omaira Lares, full Aruba tabata conoce su color politico.
“Hopi di AVP mes, e tempo ey, a bisa cu por bay over na nombra un persona asina, pero ta dun’e merito no a base di color politico, sino pa diplomanan. Net hustamente e departamento ey ta yuda y colabora pa kita hende for di trabao, den e forma aki, hunto cu Evelyn Wever-Croes, na ken mi ta pone responsable di cada pan cu ta wordo kita di tata y mamanan di famia. Ta incorecto, inhusto y na e momento aki tambe e ta mustra cu no tin piedad, ni curazon, sentimento pa hende y ta kita pan di tata y mamanan di famia”, segun e ex-premier.
Eman ta asegura cu e personanan aki, cada un ta bay gana nan caso dilanti corte. Esnan cu a bin dilanti Eman, ta personanan cu ta traha pa departamentonan of bureaunan cu no ta di awo a wordo instala. Tin varios aña ta traha cu entre otro, e mesun directora, Lares, sa cu bureau Innovatie tin añanan largo ta trahando pa e ta un bureau y cu e hendenan ey ta forma parti di e bureau.
“Bureau MFA tin varios aña ta traha y ta den proceso pa bira un bureau. E hendenan a wordo scogi y nombra, pa añanan caba y tur documentacion ta mustra esaki y nan ta hendenan cualifica pa haci e trabao.
Bo Bario, mesun cos. No ta di awe. E tin varios aña ta andando cu el a bira bureau, cu henter e formatierapport cu a wordo traha, cu e propio Omaira Lares ta forma parti. Henter e dossier di tur e bureaunan aki, ta asina completo cu ora yega dilanti di corte nan lo haya razon, aunke logicamente ta penoso cu e hendenan mester bay pasa den e momentonan di insiguridad, net den final di aña”, ex-prome minister ta indica. Eman no tin duda cu nan tur lo gana nan caso y finalmente nan mester wordo poni bek na trabao y por haya bek nan posicion.
“Pero ta lamentable cu esaki ta sosode. No por compronde con por tin consehonan y si tin conseho cu a wordo duna pa substancia e decisionnan cu ta mira cartanan di retiro ta drentando, mi ta sigur cu dilanti corte, gobierno no lo pasa e test di kico ta un estado di derecho, kico ta gelijkheidsbeginsel. Kico ta derecho di un hende cu haya un trabao y contrato cu gobierno. Por ta nan sa tambe cu e hendenan lo gana nan caso, pero kier saca envidia, rencor of cu nan kier crea un espacio temporal, vacante ficticio pa por nombra hende” sr. Mike Eman a expresa.
Unico cos cu por conclui for di esaki ta cu e storia cu hende ta central, por ta central pa famia y amigonan, pero no pa e pueblo y esey ta loke ta mira a bin bek den gobernacion di Aruba, segun sr. Eman, ken ta lamenta esey pa e curso di e pais aki.
FUENTE: Con información de https://www.diario.aw - (PULSE AQUÍ)
