Aruba como pais ta mara na cierto protocol cu ta regla e parti di asilo. Den cuadro di esey como pais, tin cierto proceduranan na su luga dependiendo si ta trata di peticionnan individual of gruponan grandi y otro. Esakinan, cada ken tin un tarea den e parti aki.Dimas tambe, segun su directora, Kathy Ruiz-Paskel. E rol di Dimas, ta cu nan ta trek e comision di evaluacion pa asilo. Den e ultimo añanan, Aruba, pa loke ta trata peticionnan pa asilo, no a conoce dimas cu 10 caso pa aña. E casonan ta relativamente tiki. E ultimo aña aki tambe a conoce algun caso, pero tampoco e no a surpasa e cantidad aki.
Pero e ta keda un punto cu Dimas ta monitorea y tin diferente procedura na su luga, depende con e desaroya. E cliente of e persona cu ta pidi asilo generalmente lo pidi esey na frontera, pero tambe tin otro maneranan.
Na momento eynan lo tuma su peticion den tramite y tin un grupo di experto di diferente dienst cu lo bay analisa kico tur a trece dilanti y ta scucha e personanan aki tambe. Finalmente minister lo tuma un decision si ta trata of no di un peticion cu ta rekeri di proteccion, segun e tratado. Bo tin tambe hendenan cu ta migrantenan economico cu lo trata di haci un peticion asina. Den e caso ey, finalmente lo sali e ora un decision negativo. Igualmente cu tur decision. Tambe un negacion di un asilo por wordo apela y tin diferente caso awor aki den apelacion.
No tin ningun apelacion cu a wordo honra te ainda, segun Kathy Ruiz-Paskel. Den e añanan cu a pasa, tur aplicacion cu a wordo haci despues di estudio y a scucha e hendenan y analisa nan papelnan, a yega na e conclusion cu nan no ta bin na remarca pa e proteccion aki. Den e 10 añanan cu Ruiz-Paskel tey como directora, no tin ningun caso honra.
E tratado ta stipula kico ta e motibonan pakico un hende ta rekeri di proteccion. A base di e tratado ey lo toets si esey lo tin suficiente base pa e persona cu ta pidi pa tal. Un hende cu ta bin pasobra e kier lo miho aki na Aruba, tin cu pidi pa un permiso regular y cumpli cu e rekisitonan aki pa por bin na remarca por ehempel pa un permiso pa trabao, of famia, of otro. E motibonan pa cual por duna proteccion ta defini segun e tratado. Aruba no ta mara na e tratado, pero si ta mara na e protocol y como tal ta carga e responsabilidad eynan tambe. Diferente dienst tin nan rol den esaki y ta aporta tambe na prome cu yega na un proposicion pa un decision di minister.
Un di e motibonan ta si bida di e persona ta na peliger, segun Ruiz-Paskel.
Den e ultimo añanan tabata tin diferente nacionalidad. Tabata tin nacionalidad Colombiano, tabata tin nacionalidad Venezolano, Cubano, Surinameño. E ta varia, Ruiz-Paskel a bisa por ultimo.
FUENTE: https://www.diario.aw - (PULSE AQUÍ)
