Parlamentario Endy Croes a elabora durante conferencia di prensa riba e bishita di Minister President Sra. Evelyn Wever Croes na Hulanda. E parlamentario a splica cu esaki ta e promer bishita oficial di trabao cu Minister President ta haci na Hulanda desde 17 di November 2017 cu Gobierno a wordo instala y a huramenta. Minister President tin un agenda hopi ocupa cu un serie di reunionnan hopi importante cu entre otro JPH Donnor vice presidente di Raad van State, Promer Minister di Hulanda Mark Rutte, Stef Blok Minister van Buitenlandse Zaken, Raymond Knops Staatsecretaris van Binnenlandse zaken en Koninkrijksrelaties y varios otro instancia di suma importancia.Promesanan no cumpli di Mike
E meta principal di e bishita ta pa cuminsa reestablece confiansa bek cu Hulanda mester tin cu Aruba. Parlamentario Endy Croes a continua splicando cu e confiansa aki ta herida y ta kibra door di e mal gobernacion di e gobierno di Mike Eman. Promesanan y palabracionnan haci na Hulanda cu nunca a wordo cumpli. E desaster financiero cu Mike Eman a laga atras unda den apenas 8 aña a redobla e debe di pais Aruba y a redobla tambe e interes di pais cual a alcansa awe 216 MIYON pa aña y cual ta igual na 600 mil florin pa cada dia na interes solamente. Mike Eman a manipula cu cifranan hibando un maneho incidental manera bende edificionan di gobierno y tambe exoneracion di 60.5 MIYON di SVB pa asina purba cumpli cu Ley di LAFT changando Hulanda y CAFT di e forma aki. Den 2017 Mike Eman a bin cu e storia di CITGO y a hinca 73 MIYON den presupuesto cual no a bira un realidad y a causa cu Mike Eman a percura pa un deficit grandi den 2017 di 155 MIYON florin y asina nunca a cumpli cu e Ley di LAFT cu ta prescribi cu e deficit mester ta 25 MIYON den 2017.
Desconfiansa di Hulanda
E traspaso pa gobierno nobo tambe a bay ful for di sla unda a desmantela tur computer, delete harddisk, sconde masha hopi documento cual a tuma bastante tempo extra promer cu por a cuminsa goberna. Tur esakinan Hulanda a cuestiona. Pues maske ta trata di un gobierno nobo cu no a haya oportunidad pa goberna na un manera decente ainda toch bo ta sinti e desconfiansa grandi di Hulanda. Promer Minister a mustra Hulanda cu apesar di tur esakinan a logra lora manga di camisa y a cuminsa traha pa drecha e “caos” cu a hereda. A logra corta den presupuesto 2018 di un deficit cu AVP a laga atras di 275 MIYON cu 125 MIYON como e promer stap y esaki a logra yega na un deficit di 150 MIYON pues 5 MIYON menos cu na 2017 cu ta e muestra di e boluntad politico pa asumi responsabilidad.
Surplus structural
E caminda mas grandi awor ta pa yega na un SURPLUS. Di acuerdo cu Ley di LAFT esaki mester a sosode den 2018 cu un SUPLUS di 25 MIYON. Enbista di e desaster hereda di AVP esaki a bira imposibel y e punto di discusion. Prome Minister Evelyn Wever Croes hunto cu su gobierno ta haciendo lo maximo pa yega na un SURPLUS structural pa evita cu Aruba den futuro por cay bek den problemanan financiero manera cu AVP a ocasiona. Pa cu esaki tin mester un aprobacion di Hulanda pa e caminda cu lo wordo encamina pa por logra un SURPLUS y un finansas saludabel.
No por haci milager
Segun Endy Croes un medida cu mester wordo tuma ta pa mara e mannan di AVP di tal manera cu nunca pero nunca mas AVP bin na poder. Negosacionnan pisa ta andando entre Aruba y Hulanda pa por yega na un acuerdo alrespecto e topico aki, esta e “Herstelpad”. Hulanda kier mira esaki den corto tempo mientras Aruba ta para duro cu no por haci milager cu e desaster cu parcialmente Hulanda a permiti y sigur no lo acepta pa causa e pueblo mas dolor y pesey ta bringa pa logra un SURPLUS den minimo 4 aña. Esey ta punto di salida di parlamento tambe. Croes ta termina bisando cu nos tin Fe y speransa den capacidad di nos Promer Minister Sra. Evelyn Wever Croes y cu e guia di nos Creador e lo por logra cosnan grandi na beneficio di Pais Aruba y nos conciudadanonan. No ta facil, ‘maar waar er een wil is is er een weg!’
FUENTE: https://arubanative.com - (PULSE AQUÍ)
