Informacion nobo for di Caracas, ta indica cu e conocimento cientifico ta cruza frontera facilmente, y ehemplo di esey ta e combersacionnan cu e Fundacion Venezolano di Investigacion Sismologico (Funvisis) ta haciendo cu islanan di Caribe, cu e meta pa suministra servicionan specializa na paisnan cu no tin un Departamento di Investigacion Sismico.Roberto Betancourt, presidente di Funvisis, a bisa cu den cuadro di relacion solido di cooperacion bilateral, nan lo bay establece convencionnan interinstitucional cu Aruba, Bonaire y Curaçao pa cumpli cu instruccionnan cu a ser duna pa Ministerio di Ciencia y Tecnologia di Venezuela.
A mustra cu gran parti di e islanan aki ta usa e mesun Departamento di Meteorologia pa compronde con e actividad sismico ta desaroya siendo cu nan ta totalmente diferente, pues nan no ta conta cu specializacion riba e tema. Danki na e formacion y capacitacion di e investigadornan, nan por suministra e islanan aki, e servicionan sismologico.
E asistencia special duna na Aruba, Bonaire y Curaçao lo enfoca riba e monitor di actividad sismico, como tambe den accionnan di supervision pa determina e ocurencia di maremoto, via di e Caribbean Tsunami Early Warning System.
E unidad cu ta wordo opera pa Funvisis, lo bira e prome centro di alerta trempan den Caribe, y lo mantene contacto permanente cu Pacific Tsunami Warning Center (PTWC) cu ta na Ewa Beach na Hawaii, cu ta un di e dos organizacionnan specializa di Merca.
E Centro di Alerta di Tsunami, segun Betancourt, lo ta destina pa vigila y detecta Tsunami riba lama grandi via boeinan special cu Venezuela tin instala den lama.
FUENTE: https://www.diario.aw ->> Ir
