E regla en general ta, ora un hende presentabo cu un “oferta” asina mucho bon pa kere cu e ta berdad, bo tin di pensa mesora cu e riesgonan ta halto, peor si acaso ta un sistema di Multi-Level Marketing (MLM) of ta un oferta di Binary Option dudoso. Siman a habri, y Banco Central di Aruba a emiti un advertencia den prensa, pa hala atencion pa cu actividadnan di “EXP Asset” cu ta tumando lugar na Aruba.Aparentemente despues di e fracaso di KaratBars y tambe Questra, ainda tin hende cu ta inverti nan placa sin cu nan ta cauteloso.
Awor ta promoviendo ofertanan via EXP Asset, cu ta un compania cu apenas na 2017 a wordo crea na Polonia. E ta pidi pa bo inverti $50 na comienzo, y bo lo haya 1% pago bek pa dia.
Banco Central di Aruba a emiti un advertencia pa adverti publico di Aruba pa cu actividadnan di EXP Asset.
EXP Asset ta ofrece servicionan di inversion na Aruba, por ehemplo via Social Media manera Facebook. Pero hecho ta cu EXP Asset no tin un permiso di Banco Central Aruba pa por ofrece e sorto di servicionan menciona na Aruba.
Pesey mes BCA den nan advertencia duna na prensa, nan ta conseha publico enfaticamente pa no response na cualkier inversion ofreci door di EXP Asset.
Den pasado caba Banco Central a yega di adverti publico di Aruba pa cu esnan cu ta inverti ciegamente den servicionan manera KaratBars, etc. Y e sostenedornan di KaratBars e tempo aya a critica Banco Central.
Pero awor? Por mira cu tur e advertencianan ey a bira realidad! Mescos cu Questra, di cual te ainda e doñonan di Questra Holdings a desaparece y ta scondi. Nan a bay cu tur e placa di cien miles hende rond mundo.
Banco Central ta enfatiza cu no por tin rendimento halto sin tin un riesgo halto. Alega lo contrario, por ta un indicacion di fraude. Conseucentemente abo como cliente tin di tuma maximo cautela.
FUENTE: http://www.diario.aw ->> Ir
