Diasabra autoridad local a haya nan ta atende un caso serio cu a socede den oranan di madruga na costa zuidoost di e isla, cu a cuminza ora un grupo di como 20 stranhero ilegal a purba di drenta Aruba via di lama.Unidadnan di Vigilancia di Costa ta pasa constantemente den e area di Colony ta check movimento. Uno a caba di pasa y a nota nada. Pero alrededor di 3:55 am, e di segundo unidad di Vigilancia di Costa, durante patruyahe a bin topa cu un boto na altura di santana di cacho. Pues e boto aki lo a caba di yega eynan.
Nan a pidi di biaha pa asistencia di patruya di San Nicolas, como tambe Polis Maritimo. Nan a presenta pa duna un man y tambe kustwacht.
Buscando rond, autoridad riba tera a logra detene 3 ilegal no mucho leu di e lugar di susedido.
Kust Surveillance un rato despues ta bin topa cu un curpa sin bida no mucho leu di unda a haya e boto. No tabatin ningun identificacion di e persona masculino sin bida.
Polis a manda busca Docter, y despues cu solo a sali, pa 7:15 am, Dr. Texier a constata morto.
Mirando e embergadura di e caso aki, y sospechando cu lo por tin mas hende cu lo a bula di e boto purbando di landa yega tera, a dicidi na pidi Guardacosta pa yuda cu nan Helicopter.
Durante un buskeda cu Helicopter, nan a señala un curpa sin bida ta drief den lama. Asina a coordina cu boto, y nan a hisa e curpa, y bin cune tera. Atrobe a pidi yudanza di docter. Pa 8:45 am, Dr. Texier a constata morto di un otro ser masculino cu tampoco tin identificacion riba dje.
Departamento Tecnico a yega na e lugar tambe pa asina haci nan investigacion, y algun Polis mes a yuda pusha, rek, y saca e boto for di lama y pone riba tera. Despues un servicio di Takelwagen a wordo busca pa transporta e boto aki sin-nomber rumbo pa Guarda Costa.
Slachtofferhulp tambe a wordo poni na altura, como tambe Departamento di Narcotica, y mas.
Despues di tur esaki, patruyanan a bin topa cu 2 persona mas den Colony, y nan a bay over na detene y asina pasa nan tur pa personal di Guarda Nos Costa.
Un di esnan cu a keda deteni, a dicidi na suministra informacion, bisando e.o. di unda nan a sali, y cuanto hende tabatin den e boto. El a bisa cu nan tabata 20 persona en total cu a subi e boto pa asina huy for di e crisis social y economico cu ta azotando Venezuela. El a bisa cu nan no a bin cu arma, ni cu droga. Pero e ta disgusta cu e Capitan a ordena nan tur pa bula demasiado trempan y mucho leu di costa, pa nan landa bin tera. Na final pa nan sorpresa, e Capitan mes a dicidi na bay benta e boto na tera.
Cuanto di e 20 aki a logra subi tera? Cuanto di nan lo a sucumbi riba lama? Te cu merdia, ta solamente 2 curpa a ser haya morto, y no ta descarta e posibilidad cu por tin mas morto.
Tin di corda cu no tur hende cu ta huy di Venezuela tin antecedente criminal of mal intencion. Simplemente nan ta bandona nan pais pa asina busca un forma pa sobrevivi.
Algun siman pasa ya caba DIARIO a mustra riba e sugerencia di algun experto, cu e Marine-Radar cubriendo full Aruba mester wordo poni bek den servicio lo mas pronto posible, y pa e wordo controla 24 ora door di un hende na Aruba mes. Fuera di esey, lo ta bon pa instala diferente FLIR-Security Cameras na costa zuidoost di Aruba, pa asina hasta den scuridad, por sigui movimento di cualkier ilegalidad cu ta pasando na oriya di lama.
Claro cu a tende Gobierno mustra cu lo busca forma pa hasta Hulanda duna un man cu Mariniersnan yuda cu e patruyahe. Pero esaki tin di bay via di Gobernador y Ministerio di Defensa na Hulanda, y hopi biaha nan no ta gusta mete den asuntonan cu realmente tin di haber cu vigilancia policial basico na un pais.
FUENTE: https://www.diario.aw ->> Ir
