“Kico autoridad a dicidi cu e asunto di asilo politico?” Un pregunta cu ta pidi cerca pueblo di Aruba cu ta sigui desaroyonan na Venezuela cu hopi preocupacion. Manera DIARIO a indica, e problemanan cu a surgi siman pasa a causa hopi impacto den comunidad. Hopi hende no ta di acuerdo cu e forma cu e situacion a desaroya y cu ainda ta discusion pa e pais.“Kico kier bay busca den Corte? Ken ta bay paga tur gasto cu tin den Corte? Cuanto gasto pais Aruba mester sigui haci sin cu e tin pa su mes? Abogado liber refugiadonan ta haya? Pakico Aruba no tin derecho di sa unda hendenan cu a yega sin permiso ta keda?”
Preguntanan cu ta wordo haci den un situacion mundial di tension creciente na Venezuela pero tambe na otro paisnan.
“Mester proteha nos pais. No por ta cu entrada ilegal ta haya sosten den un situacion mundial peligroso. Mester tene cuenta cu pais Aruba no ta gobierno cu solamente ta representa pueblo di Aruba,” a wordo splica.
Tin basta decepcion pa e hecho cu te awor no ta comprendibel si autoridad ta haya cu polis mester detene un persona cu drenta e pais na forma ilegal.
Segun hopi ciudadano Corte di Husticia mester splica miho kico Hues Comisario ta haci ora un ilegal, despues di detencion pidi asilo politico. Kico ta bini na prome luga, mester bira cuestionabel atrobe.
“Situacion a cambia. Hulanda mes a pidi Union Europeo pa tene cuenta cu e islanan aki. Con por ta cu un persona cu drenta e pais como ilegal y sa cu e por pidi asilo politico y tin e placa pa paga un abogado, no por wordo controla dor di husticia y por haci y deshaci manera e kier na Aruba?”
Corte di Husticia mester duna comunidad splicacion si polis por detene un persona, hiba e persona manera ley ta exigi na un Hues Comisario pa e Hues Comisario dicidi kico ta pasa. Esaki no a bini dilanti den e declaracion di Corte.
Di otro banda mester cambia ley cu urgencia y di tal forma cu por controla kico ilegalnan cu uza peticion di asilo politico pa keda Aruba, ta haci na e pais.
“E caso den LAR ta contra nos pais y no contra un persona. Nos pais ta haya su mes den mas y mas problema cu ta costa placa di comunidad cu awor mester defende su mes pasobra e ta haci bon cu sernan humano”, a wordo treci dilanti.
DIARIO ta keda pendiente.
FUENTE: Diario de Aruba
