(Aruba) Desaparicion di Robyn Gardner ta birando un misterio

ORANJESTAD (AAN): Demasiado asunto no ta cuadra, declaracionnan sin base, testigonan contradictorio y un video cu ta habri caminda pa un misterio cu keto bay no tin contesta pa tur pregunta. E investigacion relaciona cu e dama turista Robyn Gardner keto bay ta habri y Polisnan encarga no por caba di finalisa e “puzzel”, banda di e hecho cu e unico sospechoso di desaparicion di e dama keto bay ta mantene un silencio hermetico.
Sinembargo, tin un video di seguridad graba den vecindario cu ta percurando pa bastante interogatorio.
Autoridadnan local ta sospechando awor cu lo por tin e posibilidad cu nunca e sospechoso no a drenta lama cu su amiga, manera el a declara na Polis.
Camara di seguridad a capta e auto yega, bay back despues di 10 minuut y bolbe regresa pa mas o menos 6’or di atardi pa bati alarma.

Tambe Polisnan nunca no a topa cu fleppers manera a bisa, pues tin duda cu e sospechoso lo por a landa eytras cu keds bisti manera e ta pretende. Mas leu den su declaracion cu e por a mira un bandera di Aruba siendo cu e atardi ey e negoshi den vecindario a baha bandera for di 4’or di atardi caba.
Asina tin un lista di misterionan cu ta haci finalisacion di e caso aki dificil. Tanten cu no descubri e curpa, sea bibo of morto, lo no por sigui specula mas. Mester menciona cu algun declaracion di e sospechoso tampoco ta cuadra cu otro.
Ta intencion di husticia pa wanta e sospechoso deteni, pero den e tempo stipula mester yega na e evidencianan of declaracionnan convincente pa Corte por dicidi riba su detencion preventivo.

FUENTE: http://www.diario.aw/2011/08/desaparicion-di-robyn-gardner-ta-birando-un-misterio/