No ta cuestion di evalua cada politico di MEP segun su actuacionnan, sino segun e falta di nan actuacionnan cu a pone e partido lomba contra muraya. Ainda e partido tin salvacion? Mi ta convenci cu si, pero a base di un gran esfuerzo pa uni e base di nobo, proponiendo programanan realistico cu por sirbi di aliciente pa un publico cu a bira lomba pe cu e disgusto crea a traves di 9 aña di corupcion y nepotismo.
Awor nan ta den e proceso di elegi un lider nobo, pasobra Nel a duna indicacionnan no mucho claro cu e no ta interesa di sigui ocupa e puesto. Hopi ta duda cu di berdad e kier separa su mes di mundo politico, y ta tene e porta habri pa cualke eventualidad, pa no sufri ningun sorpresa desagradable. Nel no por sin politica; e no por sin e batuta di lider, a menos cu e dicidi di bira mudo di berdad y evita mas declaracionnan y provocacionnan cu den nada ta sirbi e partido, y menos ainda, e mes.
E lucha pa e liderazgo, apartando Nel, ta entre tres candidato cu no a convence un gran parti di e seguidornan pa por bisa cu tin mas di un di nan cu e posibilidad di gana e competencia. Tur hende sensato ta pusta riba Evelyn, pa hopi motibo, su relacion cu e fundadornan di e partido, e influencia di su tata, su preparacion escolar, su labornan den gobierno, enfin, varios factor cu ta combina pa dune e mayor posibilidad di sali triunfador sin susto y sin problema. E otro dosnan tey, segun mi, pa pronk, pa yena un formula cu por ser usa pa convence Pueblo cu ta trata di un eleccion democratico den cual cualke candidato por postula su mes, aunke en vano. Den practica, e no ta funciona asina. E otro dos candidatonan tey pa cumpli cu e teoria democratico, y no pasobra nan tin algun posibilidad di sali ganador. Esun cu por a bati Evelyn no ta participando den e contienda, y mi ta referi aki na Booshi.
Di awor pa eleccion, e panorama di posibilidadnan ta bay bira mas amplio, y esey ta bay faborece MEP hopi si e cuminza actua manera un partido di cohesion, di union di ideanan, di lealtad di parti di su candidatonan cu aspiracion di subi e lista. Den e cuestion di lealtad cu su seguidornan, MEP ta bati AVP mahos! Y ta e factor ey ta sirbi pa duna e partido e posibilidad di crece y purba sali victorioso den proximo eleccion. Si MEP coordina su ideanan, bin cu plannan concreto pa aumenta e mercado di empleo pa Arubianonan, stimula e economia cu proposicionnan viable, generaliza su politica pa inclui e mayor cantidad di hende, tur cos ta bira posible pe. Mientras AVP, via un o mas di su politiconan reciente, sigui bira lomba pa su aliadonan, y MEP continua constante den su lealtad cu su aliadonan y amigonan, y e cera acuerdonan cu medionan di comunicacion cu por yuda nan durante campaña, ta ken por bisa kico e resultado di proximo eleccion ta bay ta?
Personalmente mi no ta kere den e resureccion di PPA, no cu e liderazgo cu e tin awor, y ni si e logra incorpora un par di candidato atractivo. PDR no ta un partido completo actualmente; e tin un lider hopi activo, hopi inteligente y interesa den busca solucion pa e problematicanan cu tin na Aruba, pero pa gana eleccion e tin di bay re-estructura e partido y atrae candidatonan cu e poder di convence. Nan no mester ta necesariamente vote-getternan grandi, pero si mester tin e carisma pa por acumula un cantidad importante di voto.
Mi ta sigui insisti cu si MEP logra aliadonan nobo den e medionan di comunicacion, si e demostra un sinceridad grandi pa elabora programanan realistico cu por faborece e mayor cantidad di hende, su posibilidadnan ta crece proporcionalmente. E por ta den un decadencia casi absoluto actualmente, pero e tin e capacidad pa pare y cuminza surgi di nobo como e partido cu e tabata bao e liderazgo di Betico. Tur cos ta depende di e cambio di mentalidad cu mester predomina den e partido, y con nan ta bay enfoca e solucionnan cu nan por ofrece pa e problemanan financiero y di otro indole cu tin Aruba casi paraliza.
FUENTE: http://www.diario.aw/2011/08/e-decadencia-di-mep-ta-continuo-o-temporal/
