“Recuperacion economico di Aruba no ta un casualidad”

ORANJESTAD (AAN): Durante di e añanan 2008 pa 2010 economia di nos pais a bay atras cu mas o menos 15%. Desempleo a cuminsa subi for di 2007. Na 2009 ora gobierno a cambia e cifra di desempleo tabata di 10%. (Wak cifranan di Banco Central) Camara di Comercio a registra un caida den cantidad di companianan registra.
Den e dos añanan cu a sigui (2009-2011) Aruba tabata tin un gobierno nobo (AVP) cu e reto grandi di saca nos pais for di e abismo aki. Awe dos aña despues y en todo caso pa 2011, Banco Central ta pronostica un crecemento economico di 10%. Pa hopi hende esaki ta zona straño! Casi increibel! E ta en berdad asombroso.
Tambe pa expertonan di afo. Pero si Bo wak kico e gobierno di AVP a haci den e periodo aki, pa logra e recuperacion economico, di un caida di 15 % pa un crecemento di 10 % den dos aña, anto Bo ta compronde pakico esaki ta.
MANEHO PA RECUPERA: E maneho di e gobierno di AVP di baha gastonan di gobierno combina cu aumento di actividad economico cu inversionnan grandi, ta dunando resultado. E formula aki ta worde uza rond di mundo den diferente forma, pero e esencia ta cu ta stimula economia pa crea trabao y aumenta entrada enbez di aumenta belasting.
E actividadnan economico door di creaccion di trabao y importacion, ta haci cu tin mas placa ta circula den comunidad. Companianan ta haya mas entrada y mas hende ta haya placa pa biba cun’e. Indirectamente gobierno ta haya mas entrada via belastingnan existente di importacion y salario.
Gobierno di AVP conscientemente a scoge pa no aumenta belasting door di mas medida, pasobra esaki a kita placa for di pueblo, hisa costo di haci negoshi y stroba creaccion di trabao. E forma cu gobierno di AVP a baha gasto tambe ta diferente. A baha gasto den un forma selectivo cu no a afecta esnan di menos entrada.
A baha gasto tambe door reforma por ehempel e sistema di pensioen di gobierno. E reforma aki a baha e gasto di gobierno den e sistema di pensioen, pero na mes un momento a fortifica e fondo di pensioen y sigura e pensionadonan nan pensioen pa largo plaso. E inversionnan cu gobierno a haci cu placa di Fondo pa Desaroyo ta hopi y grandi.
Hopi di nan ta den infrastructura di nos pais. E inversionnan aki a corto plaso ta crea trabao, stimula nos economia y famianan ta haya entrada atrobe. A largo plaso e ta sigura cu e infrastructura di nos pais cu tabata den decadencia serio, ta worde renoba y mehora. Esaki ta duna un base solido pa sigui inverti y crece den futuro.
Banda di esaki gobierno a crea incentivonan pa sector priva inverti mas den nos economia. Finalmente gobierno a busca companianan grandi y stabiel di renombre mundial pa bolbe traha cu of inverti den Aruba.
E relacion di un pais chikito cu companianan grandi asina ta duna nos e posibilidad pa saca hopi mas di e inversionnan cu nos pais ta haci. Mas inversionista y turista cu bin Aruba lo haci mas uzo di e infrastructura nobo, e centronan nobo di Aruba y e facilidadnan nobo di nos pais. Esey lo haci cu e rendimento di e inversionnan lo ta mas grandi.
Ta e combinacion aki di inversionnan, incentivonan, atraccion di inversionnan pa renoba infrastructura di nos pais y e “partnership” cu pais y companianan stabiel, a haci cu nos pais ta recuperando for di e caida grandi causa door di mal maneho na Aruba y un crisis mundial grandi.
E maneho di recuperacion di e gobierno di AVP ta funcionando, apesar di cu mundo mes ta den e crisis economico y financiero ainda. E no ta un casualidad, pero resultado di un maneho consciente pa hisa Aruba Ariba atrobe!

FUENTE: Rene Herdé - http://www.diario.aw/2011/08/recuperacion-economico-di-aruba-no-ta-un-casualidad/