Diasabra mainta trempan prome cu solo a sali Atraco Team a prepara un bon team pa subi caya. For di 5’or e preparacion a cuminsa unda pasa di 6’or a drenta un caya den casnan di pueblo na Tarabana. A rondona e cas.
Varios recherche di TBP reforza pa otro agentenan di cierto departamento entre otro Cuerpo Tecnico tabata tin e area rond di cas bon vigila. A bay cu dos cacho tambe y nan tabata cla pa move si cos a bay robez.
Agentenan a yega na e cas y bati na porta. E cabez di cas cu ta un homber a habri e bentana y atende cu e sub-fiscal. A splike riba e poder cu nan a haya pa bin drenta e cas y busca un of mas habitante cu ta drumi y a comete atraco basta serio na Cumana.
Berdad a topa cu un mama y su yiu Venezolano. Nan dos a keda deteni. Un otro homber cu tambe ta ilegal y scondi na Aruba a ser hiba warda. E mama cu e yiu y un di tres persona cu ta fugitivo ainda a comete e atraco riba un cas na Cumana.
E trio aki no local a pidi e persona den e cas pa un number of un persona. E señora di 47 aña na Cumana kende ta biba su so manera un bon Arubiano a bay yuda. Ora cu el a haci esaki na dado momento e tres atracadornan entre nan e mama cu e yiu Venezolano a dal e victima benta abao den su cas. Nan a mare na man cu pia y tapa su boca. Despues a listra henter e cas y bay cu cosnan di balor. Joyanan y placa ta parti di loke a worde hiba.
Durante dia a haya varios di joyanan benta cerca di Mansur Ball Park. Tabata tin ainda mas joyanan cu e victima tabata tin pero cu a ser laga atras. Atraco team a yega y ainda haya e señora mitar mara. El a logra los parcialmente na momento cu el a ripara cu e atracadornan no tabata tey mas.
Un susto masha grandi mes e señora a pasa aden den su propio cas. Habri porta pa atende hende straño por bin cu su consecuencianan. Awendia no ta facil pa haci e tipo di yudanzanan asina. Di otro banda por bisa cu e trabao intensivo di Atraco Team a duna un bon resultado. Pabien cu e bon trabao.
FUENTE: http://www.diario.aw
