E reunionnan a bay den un bon atmosfera, sumamente positivo. Ainda ta bezig den e fase final den e parti di do-diligence, caminda ta pone puntjes op de I, segun e mandatario. Pa tur claridad tin dos caminda ta cana. Tin caminda cu ta entre Petrochina cu Valero. Esey ta e benta y compra di e refineria y e otro banda ta acuerdonan cu semper tur refineria cu ta opera na Aruba lo cera acuerdonan di entendimento y compromiso cu gobierno di Aruba.
Riba e parti entre Valero cu Petrochina, nos ta laga esey pa nan asunto segun Minister de Meza. Esey gobierno no tin arte ni parte den dje, pero di locual el’a compronde cu esey tambe ta canando sumamente positivo y segun e schedule cu a worde poni. Esun di entre gobierno cu Petrochina tambe cu tin tur ingredientenan positivo bon y nos ta canando e caminda manera a worde bisa, ta yegando na e fase final di e parti aki cu pronto dentro di algun siman cu si ta asina leu, lo por yega na hunto riba tur punto y na fin di dia lo presenta tambe esaki na parlamento.
Den un forma of otro e ta worde presenta den parlamento y una bes parlamento tambe lo sa di duna su aprobacion si esey ta e caso, anto e ora ey por bisa tur cos ta worde finalisa.
A yega un momento cu Valero y Petrochina e locual cu nan ta yama un Purchase/Sale Agreement y tin parti caminda Aruba cu Petrochina lo mester firma un acuerdo cu ta captura tur e relacionnan cu un industria asina grandi y pisa tin na Aruba y su relacion cu gobierno y kico ta e afspraken y e leynan vigente cu ta relata e operacion di e refineria.
Pa bay den detaye pa diferente rason, ta negosha cu confidencialidad. Ora ta negosha, mester por discuti puntonan extensamente y no den un minuut, tres minuut, pero tin biaha simannan ta transcuri cu e discusion aki ta tuma luga. Manera tur sa, ora sinta na mesa ta wanta nan mes na e confianza cu locual ta riba mesa ta worde discuti extensivamente, nan tin nan conseheronan huridico, nan tin nan expertonan tecnico, expertonan financiero. Mescos Aruba tin nan tambe. Esaki ta e manera caminda nunca lo alcansa na un acuerdo na fin di dia. Ora bo yega na un acuerdo cu nan, esey no ta e fase final.
E fase final lo ta na momento cu parlamento y pueblo, pasobra den casonan asina aki ta den un reunion publico pueblo por scucha. Na fin di dia parlamento lo sa di tuma su posicion si e ta desaproba of si e ta aproba un convenio asina cu gobierno lo presenta na parlamento den su forma. Bisando esey e caminda ta keda hopi positivo. Ta den e parti final di completa tur locual cu mester worde completa. Gobierno por bisa pabien na momento cu tur cos ta cla y firma, pero e ta bayendo den bon direccion y segun Sr. Minister ta bon pa duna pueblo di Aruba e informacion ey.
Tin cu bisa cu no ta mes facil cu hende ta kere, ta un situacion cu mundialmente den e industria petrolero uno dificil, por a mira cuanto refineria a cera nan porta, cuanto corporacion di petroleo ta bezig ta reorganizando. Tin algun ta Sali for di otro, tin algun ta fuseer cu otro pa haci nan mes mas fuerte. Tin competencia sumamente grandi y Aruba ta worde afecta door di esaki drasticamente tambe.
Cu esaki ta e informacion di e bishita, ta sperando e siman aki riba nivel sumamente halto, gobierno ta keda intercambia idea y informacion y yega na acuerdonan cu Petrochina durante e siman aki y otro siman sigur tambe pa asina por caba cu esaki mas lihe cu ta posibel. E intencion di e refineria ta pa e worde opera manera un full fledge refinery. Kiermen ta uza tur locual ta den e refineria, su plantanan di utilidad, su plantanan di proceso, su plantanan di almacenahe, e tankinan pa crudo y pa producto.
E informacion kico lo ta e inversionnan cu por lo tuma luga den futuro na su debido tempo, esey lo bira disponibel tambe pa pueblo y pueblo mira kico ta e intencion pa e refineria den e añanan nos dilanti, Minister de Meza a enfatisa.
FUENTE: http://www.diario.aw
