Despues di un serie di combersacionan telefonico entre Promer Minister Mike Eman y Vice Presidente di PDVSA, Asdrubal Chavez, ora cu PetroChina a reduci su interes, a keda acorda cu Aruba lo haci un haci un muestra di interes oficial na PDVSA. Esaki lo a keda formalisa den un carta pa di Gobierno di Aruba pa PDVSA.
E combersacionan cu PDVSA a inicia na December 2011 ora cu Valero a informa gobierno di e necesidad urgent pa un partner of cumprado pa motibo di e perdidanan cu e margennan den refinahe di crudo na Aruba.
Promer Minister Mike Eman inmediatamente a pone contacto cu PDVSA y den algun dia nan tabata na Aruba. Na momento cu PetroChina a drenta den e ramo di alternativanan pa cu e operacion di e refineria esaki tabata den un comprondemento cu PDVSA, DIARIO a haya sa.
E combersacionnan awor cu PDVSA por inclui atrobe un participacion di interes di companianan petrolero di China of por bira uno di PDVSA directo.
Tanto Gobierno di Aruba como Valero a pone hopi energia den habri e canalnan aki cu PDVSA di nobo despues di PetroChina y ta hopi entusiasma cu e posibilidadnan mirando cu pa PDVSA e refineria di Aruba tin sigur un valor agrega.
Banda di e habilidadnan tecnico pa cu e crudo pisa, e refineria di Aruba a bira mas interesante na momento cu Gabinete Mike Eman a kita e BBO riba exportacion di product final di e refineria y a crea un regimen fiscal atractivo pa e refineria.
Esey mes tabata e motibo tambe cu Valero a restart na 2011.
E desbentaha di e margennan cu a causa e suspencion di operacion pa PDVSA ta menos un problema mirando cu nan ta dispone di e crudo cu ta ideal.
Den e siguiente dianan aki ta spera mas desaroyo riba e tereno aki. Di parti di Gobierno a confirma e contactonan cu PDVSA, pero Promer Minister Mike Eman ta expresa cu ta hopi trempan ainda pa duna un declaracion y ta keda invatisa cu gobierno no kier crea espectativanan te cu e combersacionnan yega den un fase mas avansa. Ta spera bishita di Aruba pa PDVSA of di PDVSA pa Aruba pronto.
FUENTE: http://www.diario.aw
