Asina mes tin un preocupacion cu un compania crusero cu ta yega nos isla. Su ruta ta causando problema pa seguridad di nos isla. E barco Horizon di Pulmantur a yega Aruba pa su prome bishita dialuna cu a pasa.
E barco crusero aki ta navega e ruta Aruba, La Guaira, Curaçao, Colon Panama, Cartagena de Indias y despues di un dia riba lama ta yega back Aruba.
Den e caso aki por bisa cu dialuna cu a pasa el a yega Aruba pero a sali back cu 26 pasahero menos. Aki ta trata di 26 persona procedente di Colombia. Awendia e Colombianonan cu yega via crusero ta worde considera di transito y no mester pidi Visa pa bin Aruba. Na yegada nan por baha pa haci un tour te hasta riba nos isla. Dimes nan no mag di baha of sali cu nan pasaporte.
Mientrastanto nan a subi na Cartagena y bin Aruba. Entre e 26 ilegalnan aki tin cu no mag di bin Aruba mes. Ta hendenan deporta of expulsa pa motibonan sea ilegal riba nos isla of otro motibo. Mirando loke a sosode dialuna mester bay mira con lo bay tackle e situacion aki. E ruta aki prome cu el a stop algun tempo pasa tabata conoci caba pa mesun problema.
Varios tabata e Colombianonan cu tabata keda Aruba lagando nan pasaporte atras riba e barco. Nan ta subi na Colombia cu kizas un handbag y asina haci manera ta trip crusero nan ta bay y finalmente ta keda atras na Aruba cual destino nan tabata tin den mente prome cu a subi barco.
Mester bay hiba mihor control na Colombia pa mira kendenan ta subi crusero cu un simpel handbag. Esaki por ta un motibo di sospecho. Con gobierno lo atende e asunto aki ta keda un pregunta. Turismo ta importante pero usa crusero como trampolin pa ilegalnan yega nos isla y entrenan kizas peligroso ta algo cu mester worde atendi seriamente. E pasaportenan e compania maritimo encarga cu e crusero ta keda cu nan ora e barco sali y pasa nan over na hefe di IASA.
FUENTE: http://www.diario.aw
