Varios famia di e ex-presidente aki ainda ta haciendo aportenan grandi den politica Americano awendia.
Prome Minister Mike Eman a yega di ricibi bishita di Joe Kennedy, pero tambe tabata di bishita serca e famia na Merca pa intercambia di idea riba varios topico di interes mutuo. Den e combersacionnan a papia tambe di plannan di Gobierno di Aruba pa renoba e edificio cu ta hiba nomber di John F. Kennedy.
E prome scol tecnico na Aruba, cu inicialmente a haya e nomber di Arubaanse Technische School y cu den añanan ’60 a cambia na honor di e presidente cu a perde su bida di un manera hopi tragico y tempran, pero cu asina mes a contribui grandemente y positivamente na hopi causanan social fundamentel na Merca y mundo henter: John F. Kennedy School.
Joseph Kennedy, e di dos di e diesun yiunan di Robert Kennedy kende tabata Ministro di Husticia y tambe un Congregista den Senado Mericano hunto cu su señora a yega di bishita Aruba riba invitacion di Prome Minister Eman y tin masha grato recuerdo di e bishita ey cu nan a expresa na e mandatario Arubiano na momento cu e tabata cerca dje.
No solamente restauracion di edificio di e scol aki ta mantene e nomber di un gran lider politico mundialmente conoci, pero e tabata un deseo tambe di un cantidad di ex-alumnonan cu a bishita e scol y docentenan cu a duna les eynan. Esaki tabata un aspecto tambe cu Prome Minister Eman a comenta na Joe Kennedy pa ilustra con e sentimento di e Arubiano ta pa famia Kennedy.
Joe Kennedy ta director di un compania importante di energia na Boston. E ta fundado, director y Presidente di ‘Citizens Energy Corporation’, un corporacion non-profit hopi conoci cu ta dedica na entrega petroleo pa keinta cas di famianan di menos recurso y cu tin tambe programanan innovativo pa yuda esnan di menos recurso.
Prome Minister Eman tabatin diferente encuentro cu prensa unda a papia di e proyecto cu tin den mente pa cu e edificio aki. E plannan a wordo poni den man di Infra-Team cu a percura pa diseñonan masha bunita y a inclui un edificio extra na banda cu lo bira un auditorio, cu por wordo uza pa diferente evento di Gobierno y eventonan cultural.
Famia Kennedy, particularmente Joe Kennedy, a haya un presentacion caba di e plannan pa e edificio. E famia a priminti Aruba cu un miembro di nan famia lo ta na Aruba durante un di e diferente ceremonianan cu tin den cuadro di restauracion y ampliacion di e compleho John F. Kennedy.
| FUENTE: http://www.diario.aw |
