(Aruba) Homber Hulandes ta conta Algemene Dagblad cu el a wak Joran van der Sloot dera curpa di Natalee Holloway na Marriott Hotel

Algemene Dagblad a publica un articulo recientemente den cual nan ta bisa cu e homber Hulandes Jurrien Auke de Jong a bisa un di nan periodistanan cu el a wak Joran van der Sloot sconde curpa di Natalee den un espacio bao di Marriott hotel, riba e anochi cu e mucha muher Mericano a desaparece.
El a indica cu el a wak nan hunto na e hotel y Natalee tabata bibo.

Sinembargo despues di un rato el a wak Joran ta carga curpa di e mucha muher, el a sconde esaki bao di un parti di e hotel y a tapa esaki cu santo.

E homber a indica cu e no a bay polis mesora, door cu e mes tabata riba e tereno di e hotel ta hasiendo algo ilegal cu tin di haber cu droga.

El a viaha pa Hulanda algun dia despues y ora cu el a wak den un programa di Peter R. De Vries cu van der Sloot lo a bisa cu Natalee a muri na beach, el a dicidi di bin dilanti.

De Jong a indica cu el a bisa autoridadnan di Aruba y cu nan no a hasi nada.

El a bisa tambe cu e mes a purba hasi un investigacion.

Segun e Hulandes, Dave Holloway tata di Natalee tambe ta na altura di locual el a trece dilanti.

Tin hopi pregunta rond di locual e Hulandes a trece dilanti, mirando cu hopi hende ta haya straño cu el a warda pa bay bisa autoridadnan locual el a wak.

Tambe e pregunta ta, si tabata scur y e homber no tabata conoce ni Joran ni Natalee, con e por tabata sigur cu tabata nan?.

Si Joran a sconde e curpa na e hotel y si el a logra coba un buraco mes, un hende mester a haya holor di e curpa, mirando cu Joran no por tabata tin un scop cune pa e cobra un buraco asina hundo, cu ningun hende lo haya e curpa.

Hopi hende ta duda cu e storia aki ta berdad, sigur mirando cuanto storia a bin dilanti caba riba unda Natalee of curpa di Natalee lo por ta.

FUENTE: http://www.diario.aw