Den e caso di habitantenan pa forsa Ministerio Publico (OM) pa actua contra e dump di asbest ilegal riba tereno di refineria, corte a instrui OM entre otro pa bin cu un rapport independiente di un experto.E caso cu a bin dilanti fin di maart ta posponi te comienso di mei. Manera Bon Dia ta skirbi for di 2016 caba, e pareha De Vries bibando na Lago Height ta bringando pa nan derecho. Esaki como cu gobierno a cera un acuerdo cu Valero e tempo ey pa dump e asbest riba e tereno di refineria cerca di nan cas (y tambe di otro habitantenan di Fort Heuvelstraat).
E acuerdo aki a bay contra ley vigente na Aruba como cu e dump di asbest ta uno ilegal.
Momento cu a cuminsa cu e dump, e habitantenan a bay un caminda di cruz, entre otro Departamento di Natuur en Milieu (DNM), DTI, brandweer y polis. Nan tambe manda cartanan pa e ministernan encarga y prome minister, sin resultado. Awor nan ta bringando pa nan derecho den dos diferente caso: un caso administrativo LAR unda ya nan a gana e prome paso (publica den Bon Dia riba 10 maart) y un caso unda nan kier pa OM cuminsa investiga y actua, esta un caso penal.
Manera indica e caso den corte penal a tuma luga y hues a instrui OM awor pa bin cu un rapport di un experto di asbest pa contesta varios pregunta. Entre otro corte kier sa kico ta bou tera dera realmente, cuanto y kico lo ta e efectonan pa e bisindario. Tambe el a instrui e procurador-generaal (PG) pa papia cu minister di husticia (cu ta encarga cu e ley concerni) riba e asunto aki. Segun nos ta compronde for di e habitantenan, e combersacion entre PG y gabinete ya a tuma luga.
Punto principal cu e habitantenan ta trece dilanti ta, cu durante e dumpmento di e asbest nan no a wordo informa. Nan tin miedo pa nan salud, y tambe importante: segun e permiso duna no ta permiti pa dera substancianan dañino pa salud di hende, bestia y medio ambiente riba tereno di refineria.
Gobierno anterior a cera un acuerdo cu Citgo pa uza e tereno cerca di Fort Heuvelstraat pa no solamente un dump di asbest pero pa otro landfill. Den e contracto ta papia di un landfill pa deposita sushi genera pa ‘rehabilitation and operations activities’. Tambe gobierno anterior a indica cu kier bin cu un otro landfill den e mesun area pa sushi di cas
FUENTE: https://www.bondia.com
