(Aruba) Di berdad Giordano a purba na cobra placa di aseguro

ORANJESTAD (AAN): Tur hende sa, cu aseguro di viahe, tambe ta duna un suma halto si acaso e persona fayece durante su vakantie! Riba Diabierna, tanto Associated Press como tambe ABC News a duna indicacion, cu e homber Mericano deteni na Aruba, esta Gary Giordano, a purba di claim e poliza di aseguro, cu por tin un valor di 1.5 miyon Dollar.
Robyn Gardner ta desapareci pa varios siman caba, y awor un informe a sali indicando cu apenas dos dia despues cu e dama di 35 aña di edad no a worde mira mas, el a trata di claim e aseguro.
Segun Associated Press, Gary Giordano a trata di busca e placa di e poliza, cu tin su nomber di Gary V. Giordano como e beneficiario.
Mientras tanto, Fiscal Taco Stein na Aruba no kier a duna comentario riba e noticia di Associated Press.
Prensa Mericano ta haciendo su trabao investigativo tambe, y asina a bin haya sa di e detaye aki. Ta conoci cu Gary Giordano mes a admiti di a cumpra Seguro di Viahe. Pero awor e informe nobo aki, por ta motibo valido pa e keda deteni pa mas tempo riba e isla aki, y e por ta dunando un motibo valido pakico e lo por a comete e crimen.
E actividad aki despues di a cumpra un aseguro, ta lanta sospecho cu Giordano no ta revelando tur cos na autoridad.
Tin indicacion cu Gary Giordano a yama e compania, pa asina confirma cu nan cu e di berdad ta e unico beneficiario di e poliza di aseguro.

FUENTE: http://www.diario.aw/2011/08/di-berdad-giordano-a-purba-na-cobra-placa-di-aseguro/