Minister President Mike Eman ta contento cu e bishita di e gerente maximo di Valero, Bill Klesse. Eman ta aprecia cu na momentonan crucial ora e y Minister di Finanzas, Mike de Meza a haci apelacion riba e Presidente di Valero, Bill Klesse pa tene empleadonan na trabao y duna Aruba mas tempo pa busca un solucion pa yega na un re-apertura di e refeneria e Presidente di Valero a mustra un calidad humano hopi halto y apesar di costonan pa Valero a carga e peso pa por yega na e momento cu por a yega na un solucion.
Durante e lunan di negosacion tanto pa yega na e MOU cu Valero y despues e Settlement Agreement tambe pais Aruba y Gabinete Mike Eman a duna di su parti y pone hopi energia, tempo y bon voluntad pa mustra e interes di nos pais den re-apertura di e refeneria.
Ora Gabinete Mike Eman a cumpli, pasando promer cu 1 di juni 2010 e leynan den Staten den concordancia cu e acuerdonan cu Valero, e gerencia di Valero na San Antonio Texas di su parti a responde rapidamente.
Apesar cu e no tabata un condicion cu e MOU y Settlement Agreement lo a conduci na re-apertura, pero tabata necesario pa crea u oportunidad pa un re-apertura, toch algun ora despues cu e leynan a pasa Staten e Presidente di Valero, Bill Klesse, a yama Minister President Mike Eman y informe cu e ta mandano un delegacion Aruba pa anuncia re-apertura di e refeneria.
Un momento grandi pa Aruba y cu awe ta refleha den e cifranan di crecemento economico cu 10% di nos GDP y e crecemento di empleo.
Pesey Minister President Mike Eman ta bisa cu e lo ta un placer di awor por gradici Presidente di Valero, Bill Klesse, personalmente pa su gran aporte na e re-apertura di e refeneria.
Dialuna e delegacion di San Antonio encabesa pa Bill Klesse lo papia cu gobierno y diamars lo bishita refeneria Valero pa mira progreso di e refeneria despues di mas di 100 miyon dollar di inversion den mantencion, reparacion y renobacion.
Minister President Mike Eman ta mira hopi den e cooperacion cu Valero y e entusiasmo di Aruba ta grandi pa e joint-venture cu Valero pa yega na converti e uso di fuel-oil den WEB y Valero pa LNG. Refeneria Valero ta un partner cardinal den esaki pa motibo cu nan tambe lo mester hopi LNG pa nan nececidadnan energetico y esey ta haci e proyecto di conversion hunto cu Valero hopi mas viabel economicamente.
Tambe Minister President Mike Eman ta invatisa cu lo sigui sostene e desaroyo di Valero pa e refeneria por sigui consolida y crece pa fortifica e di dos pilar economico di Aruba. E bishita di Presidente di Valero, Klesse ta duna oportunidad pa papia riba e temanan aki na beneficio di Aruba y Valero, Minister President Mike Eman ta expresa.
FUENTE: http://www.diario.aw/2011/08/minister-president-mike-eman-contento-cu-bishita-di-bill-klesse-gerente-maximo-di-valero-na-aruba/
