Minister Hakim ta papia ku Presidente Martinelli tokante kooperashon logístiko entre Kòrsou ku Panamá

Durante di e enkuentro ‘Foro de Competitividad de las Americas’ ku a tuma lugá na Repúblika Dominikana, Minister Hakim di Desaroyo Ekonómiko i Presidente di Panamá Ricardo Martinelli a papia tokante e konekshon logístiko entre Kòrsou ku Panamá. Pa tantu Minister Hakim komo Presidente Martinelli ta importante pa e dos paisnan, ku posishon stratégiko den region Amerikano, traha huntu pa fortifiká e relashon ekonómiko.
Tambe Minister Hakim i Presidente Martinelli a papia tokante di COPA Airlines i ta kompartí e interes pa krea un kooperashon entre nan área di Freezone. Un kooperashon entre Kòrsou i Panamá por fasilitá e transporte marítimo di produktonan den region di Karibe, Amérika Latino i Merka. Den e luna di ougùstùs embahador di Panamá a bishita Kòrsou pa un mishon di komersio. Presidente Martinelli tabata hopi positivo tokante esaki. “Mi a wòrdu informá dor di e embahador di Panamá tokante e eksitoso mishon di komersio. Mi ta hopi optimista tokante e desaroyonan ku ta kanando kaba”, asina Presidente Martinelli a bisa.

Minister Hakim lo bishita Panamá pa sigui traha riba e relashon ekonómiko entre e dos paisnan.

FUENTE: http://www.24ora.com