Gobierno di Aruba ta haciendo tur esfuerso pa mantene refineria Valero habri

ORANJESTAD(AAN): Gobierno di Aruba ta haciendo tur esfuerso pa mantene refineria Valero habri. Mirando e situacion mundial di petroleo, refineria Valero ta confronta dificultad grandi cu su operacionnan si e situacion no cambia, esta pa haya e crudo na un prijs mas abou. Gobierno, consciente di e embergadura di e problema aki y su consecuencianan dramatico, ta atendiendo e asunto aki riba nivelnan halto envolviendo e instancianan cu mester wordo envolvi.
Asina dos delegacion di Parlamentarionan di e fraccion di AVP, por cierto riba propio gasto, a biaha pa Venezuela y Colombia pa eynan papia cu ehecutivonan halto tanto den gobierno como den comercio pa busca y haya un solucion.
Tambe un delegacion di comerciante a bula bay Colombia pa eynan dialoga cu nan contactonan. Diadomingo den oranan di atardi Prome Minister Mike Eman hunto cu Minister di Finansa y Energia Mike de Meza a reuni cu e delegacionnan pa tende di nan con cosnan a bay y cua ta e siguiente pasonan cu mester tuma den e situacion delicado aki.

Parlamentarionan Rene Herde y Desiree Croes siman pasa a biaha pa Venezuela na unda nan a topa cu politiconan y otro ehecutivonan. Juan David Yrausquin y Donny Rasmijn a biaha pa Colombia pa intercambia di pensamento y naturalmente en busca di un solucion rapido, ya cu tempo ta preta tambe.

Rene Herde a splica den detaye di nan biahe, cu kende nan a papia y a yega na e conclusion cu e prome paso ta poni, pero cu mester bay bek Venezuela pa asina explora tur otro posibilidad mas cu tin riba mesa. Rene Herde ta haya cu nunca cosnan ta bay di dia pa nochi, pero poco poco y cu bon boluntad por logra yega na otro.

Herde: “E impacto social cu ciere di Valero ta trece cu ne pa Aruba ta loke ta pisa hopi aki y pesey mester haci lo maximo pa logra den nos intentonan”. Juan David Yrausquin cu a bay den e delegacion di Colombia tambe a duna un splicacion detaya di nan biahe.

El a splica cu e echo cu na Aruba ta biba 15 mil Colombiano ta un punto positivo den nan negociacionnan mescos e echo cu Aruba ta riba e mesun liña politico cu gobierno di Colombia pa loke ta asercamento cu Merca. Varios escenario a wordo discuti manera construccion di un tubo bou awa di 135 kilometro pa conecta Colombia cu Aruba y asina transporta gas natural por ta un opcion.

Otro siman un delegacion di Colombia consistiendo di personanan importante di diferente nivel politico ta yega Aruba y ta papia aki cu e persona y instancianan envolvi, pa asina trata di crea e sosten necesario pa logra un cooperacion mas estrecho entre Aruba y Colombia.

Un delegacion di comercio cu a bay tambe pa Colombia a duna un splicacion di nan biahe y encuentronan. Nan a papia cu miembronan di Parlamento, cu Camara di Comercio eynnan y algun ehecutivo mas. Nan a wordo masha bon ricibi y ta haya cu nan biahe tabata positivo. Awor mester sigui riba e caminda tuma pa e solucion no laga warda mucho mas riba dje.

Mester remarka cu gobierno di su banda ta haciendo lo maximo pa logra yega na un solucion a termino corto. E no ta facil, mirando e prijs di crudo riba mercado mundial, un crisis economico y teniendo na cuenta cu rond di nos refinerianan ta cerando nan porta.

FUENTE: http://www.diario.aw