Esaki riba tur tereno posibel. Prome Minister tin pura cu esaki y ta mira mas leu cu Aruba so. “E plannan strategico pa un Aruba duradero por conduci na un strategia pa e region, mundo y henter humanidad. Durabilidad ta e yabi pa futuro di Aruba y den esaki Aruba cu masha gana kier hunga e rol di lider”.
Un grupo di invitado, entre nan algun minister y directornan di WEB y ELMAR, durante dos dia largo ta profundisa su mes den durabilidad hunto cu 7 profesor di Harvard, Jan Ebbink di TNO Caribe y Jan van der Tempel, lider di e facultad riba energia di biento na TU Delft.
Den forma masha apropia a scohe Dr.Edward Cheung Innovation Center” pa tene e seminario. Prome Minister Eman a corda tur presente cu no ta mucho tempo pasa cu e centro aki a keda inaugura y ya caba ta wordo usa pa un meta masha inovativo, esta ministernan cu ta pidi input cientifico pa desaroya un maneho duradero.
Eman ta yama e seminario un momento special den un caminda largo pa durabilidad. Cu e caminda ta uno largo a keda afirma dor di Profesor Daniel Schrag. E ta director di e Centro di Medio Ambiente di Universidad di Harvard y specialisa den geologia y ciencia ambiental.
Schrag a recorda cu cincuenta aña pasa caba tabatin masha preocupacion encuanto nos medio ambiente. “E tempo ey tabata e uso di pesticida cu a resulta di tabata peligroso pa parha cu tabata e preocupacion.
Awendia nos sa cu e problemanan ambiental ta mucho mas complica cu loke nos a pensa y cu nan mester wordo trata den forma multi-disciplinario. Ta pesey cu mi ta contento cu durante e seminario aki nos ta bay tira un bista multi-disciplinario riba durabilidad”.
No ta un coincidencia cu ta net un grupo di profesor di Harvard a wordo invita pa e seminario. “Nos Universidad ta considera su mes no solamente como un instituto di educacion pero como parti di un comunidad. Hunto cu resto di mundo nos kier yuda mehora planeta tera”, asina Schrag a bisa.
Den su introduccion Prome Minister Eman a conta con Aruba ta un di e paisnan mas pobla na mundo cu casi 600 hende riba cada kilometro cuadra. “Con nos por acomoda nos bida y nos pais sin haci daño na mundo? Nos mester delibera cu otro cua ta e desaroyo economico cu nos kier pa nos isla pa despues hunto sostene esaki.
Henter e comunidad mester para tras di e decision tuma, dus como gobierno nos mester hinca hopi energia den crea un sosten amplio dor di bay en busca di dialogo”. Riba e prome dia di e seminario a wordo discuti riba varios tema cu tin que ver cu durabilidad.
A wordo papia kico ta e consecuencianan pa Aruba ora e superficie di e awa di lama subi cu mininal un mei metro durante e siglo aki manera ta wordo premira. A wordo papia riba e adaptacionnan necesario di e flora y fauna ora cu e temperatura na mundo sigui subi.
A wordo papia riba formanan duradero di energia, pero tambe con usa nan den forma responsabel. Despues di un dia di discusion tur hende tabata entusiasma. “E ta un reto formidabel pa haci Aruba duradero y ta tremendo cu nos mag di ta parti di esaki.
Di e forma aki Aruba ta un sorto di laboratorio bibo (living lab), cu por sirbi como hardin experimental pa e region”, asina Schrag a bisa na final di e dia ora e grupo a sali pa un tour den Parke Nacional Arikok y e Parke di Molina di Biento na Vader Piet.
FUENTE: http://www.diario.aw
