Aruba Growth Fund, maneha pa Rene Kan y Milton Berlinski ta por lo menos un di e partidonan interesa pa tuma Arugas over. E fondo apenas a lanta pero tin hopi apetit pa inverti den oportunidadnan manera esaki. Arugas tin e monopolio di gas domestico y practicamente ta domina e mercado comercial tambe. E otro partido interesa pa algun aña caba ta Utilities Aruba N.V., e compania madre doño di WEB N.V. Y ELMAR N.V. Pa algun aña caba Utilities Aruba N.V. ta tras di Arugas, desde tempo di e Gobierno di Gabinete Oduber IV. E tempo ey Utilities Aruba N.V. tabata cla pa cumpra e compania di e doñonan anterior, pero Gobierno no a aprecia e intencion. Consecuentemente Utilities Aruba N.V. a distancia di e intencion y asina AIB-Bank a cumpra e compania. Cu e oferta awo, AIB-Bank ta cla pa saca su inversion y un ganashi di mas of menos 10 miyon florin adicional.
Segun informacion for di fuentenan di negoshi, tin mas compania interesa den Arugas, tanto local como internacional.
Aunke cu e lista di interesado ta largo, toch e intencion ta pa un compania local cumpra e compania local di gas, pa por sigura crecemento y pa hiba Arugas na un siguiente nivel. Un fecha pa tuma un decision final no tin ainda, pero ta mustra cu pa e aña aki ainda Arugas lo tin un doño nobo.
FUENTE: http://www.diario.aw
