Minister Oduber a manifesta cu tres aña pasa Jonathan Vieira a bin cu un idea di un festival di cine pa Aruba y cada aña a wak cu esaki a crece y a gana e reconocimento internacional cu Aruba tabata busca.
A agrega cu cada aña tambe por a mira cu e cantidad di prensa cu ta bin Aruba ta aumenta no solamente den cantidad sino den calidad.
Pa e occasion aki kier a kibra e reto cu tabata tin pa tin e medionan di comunicacion aki na Aruba pero pa percura pa un cantidad di hendenan cu ta bishita nos isla, a bisa.
E mandatario a confirma cu den e ultimo oranan a yega Aruba tres charter adicional di cual dos ta bin di Caracas y un for di Valencia. A keda confirma tambe cu tin siete vuelo charter y den menos di 24 ora cuatro charter adicional a bin. No ta descarta e posibilidad cu aeropuerto lo por ta hayando peticion ainda pa entrada di vuelonan adicional, a indica.
Mayoria di e vuelonan for di Venezuela ta “sold out” pa Aruba. Tin siete charter adicional, a resumi. Pa loke ta Aviacion General, avionnan priva, a pesar cu e weekend aki no ta un “puente” pa Aruba, e reaccion ta hopi positivo, e minister a splica.
E mandatario a laga e intencion di parti di gobierno pa amplia e festival di cine cu tres dia di concierto mas un dia na Cas di Cultura cu e presentacion di Raymann, caminda cu e meta cu a wordo poni dilanti ta cu lo ricibi un cantidad grandi di personanan adicional na Aruba pa loke ta trata e weekend aki.
E fondonan cu gobierno a pone disponible, practicamente a keda mescos durante e ultimo tres aña. No ta asina cu e aña aki gobierno lo ta subsidiando pa pone e conciertonan di Juanes y Marc Anthony. Esaki ta abase di e esfuerzonan haci pa e organizadornan, Minister Oduber a enfatiza.
FUENTE: http://www.diario.aw
