Riba dia 30 di Augustus e ta bayendo bek y ta bay traha como Abogado General na corte di Den Haag.
Diamars atardi el a sinta cu varios miembro di prensa na Ministerio Publico pa despedi su mes di nan y pa contesta cualkier pregunta cu nan tabata tin pe.
El a cuminza na bisa cu el a traha na Aruba cu masha hopi placer, despues di a yega Aruba dia 30 di Augustus 2009.
“No semper tabata mes facil ta hasi e trabaonan, pero mi a hasi mi trabao cu hopi satisfaccion”, segun Blanken, kende a indica cu na un banda ta dushi pa bay bek Hulanda, mirando tambe cu su casa tabata desea esey.
Normalmente e periodo cu un fiscal of fiscal mayor ta traha na Aruba of un di e otro islanan ta 3 aña, pero door cu e Fiscal Mayor anterior a dicidi di bay for di Aruba prome cu tempo, e periodo di Blanken na Aruba a bira 5 aña.
Durante e encuentro cu prensa el a bisa tambe cu el a bin Aruba den un periodo den cual e relacion entre Hulanda y Aruba no tabata mucho bon, unda cu algun colega di dje cu a bin Aruba den pasado lo a experiencia algun dificultad.
Segun Blanken, den su caso tur cos a cana hopi bon y el a traha cu hopi placer riba nos isla.
E problemanan cu tabata tin tabata specialmente pa loke ta e relacion entre politica y Ministerio Publico y tambe e relacion entre Ministerio Publico y prensa.
El a splica cu tabata tin algun tension den e periodo cu el a caba di bin traha na Aruba.
Segun Blanken, e relacion entre Aruba y Hulanda cu e tempo ey no tabata mucho bon, a logra mehora completamente.
“Mi tambe a probecha di e bon relacion ey”, segun e Fiscal Mayor.
Prensa a puntra Blanken na ki manera el a atende cu e problemanan cu tabata tin, pa esaki mehora.
El a splica cu e trabao cu el a hasi e no a hasie su so y cu bo tin cu hasi e trabao hunto.
“Mi ta kere cu ta importante cu mi por a inverti den e organizacion”.
“Locual mi a hasi specialmente ta inverti den ‘middle management’”, segun Blanken.
El a splica cu durante e tempo cu no tabata tin Abogado General y cu e mester a fungi tambe cu Procurador General suplente, el a logra inverti den calidad di e organizacion, pa un periodo largo.
Trahando cu mas control interno y mas a base di cierto cifranan, e organizacion a drecha remarcablemente, segun e Fiscal Mayor.
El a bisa tambe cu el a inverti hopi den e relacion cu politica, unda cu el a mustra cu ta OM ta responsabel pa persigui y castiga e criminalnan.
Blanken a indica tambe cu semper el a purba pone mas enfasis posibel riba un bon contacto cu medionan di prensa, unda cu semper e tabata disponibel si prensa tabata tin pregunta etc.
| FUENTE: http://www.diario.aw |
