Durante un ultimo encuentro cu prensa prome cu e bay, Blanken a contesta tur tipo di pregunta relaciona cu e periodo cu el a traha na Aruba.
Pa colmo net e ultimo luna y simannan prome cu su trabao como Fiscal Mayor ta termina na Aruba, tabata tin diferente suceso cu tabata rekeri hopi atencion di parti di e Fiscal Mayor, Cuerpo Policial y Ministerio Publico.
Blanken mes a papia di esaki durante e encuentro cu prensa y el a bisa cu ainda e ta corda cu e ultimo lunanan cu a pasa tabata un periodo cu hopi incidente y asuntonan cu tabata tin mester di su atencion.
El a menciona con algun tempo atras dos detenido a scapa for di KA, tambe el a papia di e candela cu a wordo cendi na KIA, despues di cual a tuma lugar tambe e welga di hamber di Prome Minister Mike Eman y tur e tension relaciona tambe cu Gobernador.
“Naturalmente Ministerio Publico y Cuerpo Policial tin cu hunga un rol den esaki y tabata pues un periodo cu tension, sin papia mes di e caso rond di Venezolano Hugo Carvajal, cu a hala hopi atencion mundialmente”, segun Blanken.
”Mi ta kere cu nos como OM y tambe KPA a atende cu e situacion rond di Carvajal na un hopi bon manera, unda cu ‘Directie Buitenlandse Betrekkingen’ a hunga un rol tambe den esaki”, segun e Fiscal Mayor.
El a splica cu tabata un experiencia unico, pa e ta e vocero durante e caso ey.
Segun Blanken, tur cos cu a wordo hasi di parti di OM di Aruba, a bay segun e regla y leynan.
“Carvajal a wordo deteni a base di un orden di detencion cu mi a saca for di dia 4 di Juli caba, mientras cu el a wordo deteni riba 23 di Juli”.
“Determinante den e caso aki tabata na final e decision di e Minister di Asuntonan di Exterior, relaciona cu inmunidad diplomatico di Carvajal”
Esaki segun Blanken, kende a sigui bisa cu ta importante semper pa Aruba tene su mes na e tratadonan cu e tin cu otro pais, manera den e caso aki Aruba tin cu Merca.
Pesey e detencion a tuma lugar y segun e Fiscal Mayor, den pasado cerca di 100 biaha Aruba a ricibi di parti di Merca, peticionnan di detencion di sospechosonan cu nan tabata busca.
Blanken a splica si cu e caliber di detenido manera Carvajal, ta trece cune hopi tension riba nos isla.
“Pesey na un banda tabata un alivio ora cu el a bay for di Aruba, pero di otro banda Carvajal ta wordo sospecha di ta un criminal importante, pues mi curazon di Fiscal toch ta haya cu ta lamentable cu el a logra Sali for di detencion”, segun Blanken.
DIARIO a puntra Blanken con Merca tabata sa cu Carvajal tabata bay bin Aruba.
“Mi no sa con Merca tabata sa, pero nan tabata sa”, segun e Fiscal Mayor.
| FUENTE: http://www.diario.aw |
