(Aruba) Lo mester considera solicitudnan di pafo pa funcion di director di KIA

E director di KIA ta cu vakantie, e ta na Aruba y disponibel pa cualkier eventualidad cu presenta, su contract ta caba na december, pues no ta asina cu KIA no tin director actualmente, Minister di Husticia, mr. drs. Arthur Dowers a subraya den un entrevista e siman aki.

Tin un management team activo den KIA y nan ta responsabel pa e institucion. Entretanto a habri e proceso di solicitud; a emiti un mensahe den gobierno mes, unda a habri a anuncia un vacatura interno pa trahadonan den gobierno haya e prome oportunidad pa solicita pa e posicion aki. Minister Dowers a splica cu, considerando e situacion actual, cu cortamento di gasto den gobierno, etc. en realidad no tin espacio pa habri e solicitud pa candidatonan di pafo di gobierno.

E mandatario a expresa cu el a keda placenteramente sorprendi di wak tanto interes pa e funcion aki y e 10 solicitudnan lo wordo evalua pa un comision cu lo entrevista e candidatonan tambe y presenta nan conseho pa cu kende ta e miho candidato(nan) pa e trabao.

Minister Arthur Dowers a bisa cu, ademas di e nivel y area di enseñansa rekeri – cu ta inclui conocemento y experiencia riba tereno di maneho y “rechtshandhaving en veiligheid” – e candidatonan mester ta dispuesto pa sigui e liña di maneho y e filosofia cu kier mantene pa cu KIA. Esaki ta encera cu e persona mester ta dispuesto pa traha pa un periodo di stage na un of mas facilidad pafo di Aruba pa adkiri conocemento “hands on” con ta trata cu e presonan y sistemanan di rehabilitacion.

E titular di husticia y maneho di adiccion a expresa cu e persona cu wordo scogi pa bira e director nobo di KIA mester por carga responsabilidad pa e proceso di modernisacion di e facilidad, e mester ta enfoca riba e rehabilitacion di presonan, tanten cu ta traha riba mantene e prison un facilidad sigur.

Ainda no a logra na stop por completo e contrabando di articulonan, unda presonan ta adkiri cosnan cu nan no mag di tin den nan cel, pues esaki tambe ta un punto unda e director mester sigui cu e trabao cu a bin ta haciendo durante e ultimo añanan.

Un punto hopi importante, segun e minister, ta cu e director nobo no ta un persona cu ta bin “dicta”, pero mester traha hunto cu e personal.

Minister Dowers a finalisa bisando cu, cu e vacatura interno, ta haciendo e maximo esfuerso pa tene e costonan mas abao posibel, pero principalmente esaki ta pa duna personanan den gobierno mes e oportunidad pa solicita prome.

A ricibi cuater solicitud for di pafo di gobierno y solamente si no haya e miho candidato den gobierno lo concidera e solicitudnan aki.

Pa fin di luna Minister Dowers ta spera di haya e resultadonan di e entrevistanan y un conseho for di e comision encarga.

FUENTE: http://www.diario.aw