(Aruba) No mester bay Embahada Mericano na Caracas mas pa busca Visa

Informacion cu Departamento di Estado di Merca a emiti Dialuna, ta esencialmente un bon noticia pa hopi hende na Aruba! Pa por facilita viahamento legitimo pa bishitantenan internacional y otorga visa pa aplicantenan cualifica, nan ta trahando mas duro pa bin cu mihor servicio na consumidornan y facilita viahe pa Merca pa sea haci negoshi, turismo, of sigui cu educacion avanza.

Awor US Consulate General Curacao a laga sa cu tin reglamento nobo pa aplicantenan di visa non-immigrant (NIV), entrante e siman aki caba.

Anteriormente e US Consulate General tabata acepta aplicacion solamente di aplicantenan NIV cu tin un paspoort Hulandes, of ta renobando un visa multiple-entry.

Pero entrante e siman aki caba, US Consulate General lo expande su servicionan di visa na Curacao pa inclui:

(1) Aplicantenan cu ta residente legal na Curacao, Aruba, St. Maarten, Bonaire, St. Eustatius of Saba pa por lo menos 10 aña. Aplicantenan mester trece prueba di residencia legal den Caribe Hulandes pa nan entrevista di visa.

(2) Residentenan legal di e islanan, sin importa pa cuanto tempo caba ta biba, cu ta aplicando pa visanan di studiante of exchange visitor: F visas (pa schoolnan cu ta duna grado), J visas (progamanan di exchange visitor), of M visas (vocational school).

(3) Muchanan bao di 18 aña di cual nan mayornan tin un visa Mericano multi-entry valido.

US Consulate General Curacao ta entrevista aplicantenan pa visa tur Diamars mainta. Aplicantenan por haci nan cita pa visa gratis riba e sistema di visa appointment system di e Consulado, despues cu nan a completa nan aplicacion online (link ta poni riba e website di Consulado).

Cada aplicante, incluyendo menornan, mester tin un aplicacion separa y paga un application fee. Aplicantenan bao di edad di 14 aña NO mester aparece pa un visa interview y por wordo representa pa nan mayor of voogd legal.

Aplicantenan cu NO ta cumpli cu e rekesitonan aki, of cu ta aplicando pa prome biaha pa visa cu menos di 10 aña residencia, of ta aplicando pa un E visa, H visa, of L visa (no obstante e nacionalidad of previo visa) mester aplica na e seccion consular di otro Embahada Mericano of Consulado mundialmente. Aplicantenan no ta wordo rekeri mas pa aplica na Caracas, y por escoge di lugarnan conveniente incluyendo Barbados, Republica Dominicana, Panama, Venezuela, Colombia, Jamaica, Suriname, y Trinidad & Tobago.

Bo por bay riba e website di US Consulate General pa mas informacion, unda tin link pa e aplicacion online y e visa appointment system, y procedimentonan completo di visa. http://curacao.usconsulate.gov

FUENTE: http://www.diario.aw