(Aruba) Bon cooperacion entre Guardacosta y Polis a pone nan detene 7 traficante

Informacion cu Curacao ta indica cu Guardacosta Hulandes, riba Diadomingo mainta durante patruyahe na Spaanse Water, a mira movimento raro. Na mesun momento, Polis a haya tip tambe di e caso aki.
Mientras cu Polisnan tabata moviendo pa e area, Guardacosta a logra di haya 8 bulto di droga banda di Kabritenbaai. Nan a tuma nota tambe di un speedboat saliendo cu velocidad halto for di Spaanse Water.

Ora cu a sigui investiga, Polis a bin topa cu un auo na Caracasbaai cu seis Curasoleño aden. Nan tur a keda deteni banda di 9:30’or di mainta. Nan edad ta varia di 21 te cu 41 aña.

Banda di 10’or, Polis a detene un persona mas den area di Directeursbaai, y esaki tin 54 aña di edad.

Mas despues den dia, Guardacosta a confisca un boto local tambe.

Den e bultonan tabatin 182 pakete di cocaina, cu un peso total di 212,4 kilo. Tambe un paki di marihuana cu 1.160 gram.

FUENTE: http://www.diario.aw