(Aruba) Abogado a pidi pa laga sospechoso bay

E sospechosonan Venezolano K.J.C.G y Y.R.T.M a presenta na corte di husticia recientemente, door cu nan a wordo acusa di, conhuntamente cu un otro of otronan, a intencionalmente haci uso di carchinan di banco falsifica den e periodo di 28 di November 2014 te 9 di December 2014.
Fiscal a cuminza na bisa cu e caso no por a wordo trata ainda y cu esaki por tuma lugar riba 5 di Juni.

Abogado Vito Carlo representando Y.M a pidi huez pa laga su cliente bay pendiente di tratamento di e caso, mirando cu lo no tin un objecion serio si e wordo laga den libertad.

Carlo a splica cu e credit card cu su cliente a uza a wordo duna na dje door di un persona di Venezuela cu ta propietario di e carchi.

E abogado a indica cu e carchi mes no ta falso.

El a bisa si cu e I.D cu su cliente a uza si tabata uno falsifica.

Segun Carlo, e chens tey cu ora e caso bin dilanti y Y.M haya un castigo, e lo a sinta caba mas cu e posibel castigo cu e lo haya.

Fiscal a bisa huez cu e si no ta haya cu e acusado mester Sali liber caba.

El a indica cu e castigo cu e ta bay pidi, ta bay ta mas cu locual Y.M lo a sinta ora cu dia 5 di Juni yega.

Huez na final a rechaza e peticion di e abogado y a dicta cu ambos preso ta keda den KIA te ora cu e caso tuma lugar riba 5 di Juni.

FUENTE: http://www.diario.aw