Dia 28 di Maart ultimo nos comunidad a wordo sacudi cu e noticia di entrada hudicial den varios cas y tambe cas di Minister di Labor Paul Croes. Dos siman despues ainda Ministerio Publico no a duna e motibonan specifico riba e entrada na cas di un minister. Esaki ta normal?DIARIO como un matutino cu semper a para banda di e berdad ta kere cu mester trece claridad den e caso aki. Con por ta posibel cu bo ta haci entrada na 13 lugar incluyendo cas di Minister y ningun detencion no ta cay! Varios hurista y investigador ta papia di un ‘fishing expedition’ cu no a logra haya locual nan tabata busca cerca e Minister. Placa, droga of arma?
DIARIO a compronde cu durante e huiszoeking a hasi uso di cachonan pa busca arma y placa na gran cantidad. Esaki no a resulta. Kiermeen por deduci cu Ministerio Publico a bay tras di un tip robez? Of ta trata di un strategia pa purba haya mas evidencia?
Den declaracion di OM a papia di Facebook cu a duna inicio na e investigacion. Kico di berdad tin den esaki?
Minister Paul Croes a tuma distancia di su trabou manera el a anuncia hunto cu Prome Minister Mike Eman. Un decision corecto.
Esaki no ta un bon noticia pa AVP cu ta den porta di eleccion. Ministerio Publico a bisa di lo trata e caso aki cu prioridad como cu ta trata di un gobernante den funcion. Politiconan di oposicion ya a cuminsa exigi cabes di Paul Croes sin cu tin un sentencia.
Otronan a comete delitonan y cu si a haya sentencia ainda ta den parlamento y ta cana rond.
Mientras no tin claridad, ta importante pa husticia haci su trabou den un forma imparcial y rapido pasobra ta carera di un hoben politico ta den wega aki.
FUENTE: http://www.diario.aw
