Ta masha poco informacion mes ta wordo suministra na prensa, di e caso sospechoso cu a pasa cu e barco Royal Princess di Princess Cruises, como 3 ora prome cu el a yega na Waf di Aruba.Manera cu DIARIO a raporta extensamente caba, un pasahero femenino a sali cay for di Lido Deck (piso 16) pero no a cay den lama. El a bay dal net riba dak di e Lifeboat #2 cu tin na banda robez di e barco, na altura di Deck #7. El a dal y kibra bentana di e Lifeboat tambe, y a fayece instantaneamente.
E riba di 3.000 pasahero riba e barco no tabata sa di nada. Pero banda di 4:30 am, e speakernan den tur camber a duna un anuncio, pa tur personal di Security acudi na Deck 7 na altura di Lifeboat 2. Un poco despues a bolbe haci anuncio, pero e biaha aki riba e speakernan den gang y areanan externo so.
Mainta ora cu e barco a mara caba na Aruba, e ora Capitan a haci un anuncio riba tur speaker riba e barco, bisando cu un incidente serio a socede, y cu ningun pasahero mag di baha, debi cu autoridad local ta bin abordo.
AUTOPSIA HACI CABA:
Prome informe tabata mustra cu un pareha tabata pleitando riba Deck 16 prome cu e muher a sali cay for di e railing. Pero prensa te ainda no a haya ningun confirmacion oficial si acaso esey berdaderamente ta e caso. Pasaheronan abordo di e barco, a splica cu tabatin cinta geel di Polis cu a blokea un pida di e Promenade.
Te poco despues di 3’or di atardi, e restonan mortal di e victima a wordo baha di e barco, y transporta cu auto di morto pa Mortuarium na Hospital. Fiscal a laga confisca e curpa pa asina practica autopsia.
DIARIO a haya confirmacion, cu autopsia mientras tanto ya caba a ser haci na Aruba, pero e resultado di esey no ta disponible na prensa.
HOMBER TA NA ARUBA:
Tabatin informacion cu hende a mira e homber ta lucha y choca e muher na Deck #16, y cu hasta e lo a pusha e muher. Pero no ta conoci si acaso e revelacionnan di testigo ey ta cuadra cu berdad of no. Hecho si ta cu Polisnan a logra haya security video footage pa mira, y esaki kizas ta e motibo pakico nan NO ta considerando e homber un sospechoso.
E homber cu tabata cu e muher, a dicidi voluntariamente pa e baha na Aruba hunto cu e restonan mortal di su esposa. Esaki por ta un indicacion cu sea, e homber no ta un sospechoso, y tambe kizas e caso aki ta un accidente.
MUHER MERICANO:
E compania Princess Cruises a emiti un boletin, informando cu Diamars mainta un pasahero femenino di 52 aña di nacionalidad Mericano, a fayece abordo di Royal Princess na momento cu e barco tabata rumbo pa Aruba. “The cause of death is not yet known at this time,” ta loke e compania a bisa den nan boletin.
“Nos ta hopi tristo cu e incidente aki, y ta ofrece nos sincero condolencianan na e famia y esnan afecta.”
E homber cu tabata cune, a wordo identifica tambe como Mericano. Su edad no a wordo suministra.
E homber a haya un hotel local unda e ta hospedando, y trahando hunto cu e Agencia local di Princess Cruises, pa por manda e restonan mortal di e fayecida bek pa Merca.
Tin indicacion cu Dialuna tambe, tabatin un pleitamento di pareha na e kade di Willemstad, net unda e barco Royal Princess tabata mara. Sinembargo no tin confirmacion si acaso ta trata di e mesun pareha aki.
DEMAS INFORMACION:
E biaha aki, ta masha poco informacion prensa local a ricibi di e caso aki. Mayoria di e detayenan cu a sali den DIARIO, a bin di fuentenan internacional y di e industria crusero, cu a duna informacion.
Prensa a keda asombra pa haya sa cu e homber no ta wordo considera como sospechoso. Esey por ta un indicacion cu e security-video tin evidencia claramente cu ta e muher mes lo a bula di e railing, pues e homber tin nada di haber cu e asunto. Of kizas tin otro indicacion pakico e homber ta liber, y voluntariamente a baha pa keda na Aruba.
E pipa di informacion for di autoridad pa prensa, “ta hopi cera” y extremadamente limita. Y pesey no por ni pinta un imagen completo di loke a pasa realmente riba e barco, ni ki tipo di rastro a haya riba curpa di e victima. Ta conoci si, cu Polis di Aruba a contact autoridad na Merca, pa asina check si tin cualkier historia/acto di e pareha aki den pasado, y demas informacion.
Pero pa awor, pues tin di djis tuma e caso aki di Diamars madruga como sea un ‘accident’ of un ‘suicidio’.
Na famia di e pasahero, DIARIO ta extende palabranan di condolencia.
FUENTE: https://www.diario.aw
