Minister di Asunto Social y Labor, Sr. Glenbert Croes, den entrevista cu nos redaccion, a duna di conoce cu actualmente tin mas di cinco mil persona cu por traha, pero ta na cas sin trabao. E pregunta ta cu si nan por traha, di con nan no ta haya trabao, of si nan ta prepara pa haci cualkier tipo di trabao.“Nos hendenan sin trabao no ta hayando bij- of omscholing, pa haci tur sorto di trabao, vooral e tipo di trabao cu nos economia y comercio ta demanda; cu e mercado laboral a base di e desaroyonan cu tin na Aruba, tin mester”.
Esey ta na unda e mandatario tin cu reconoce cu gobierno tin un trabao hopi grandi y urgente, pa sigura, atravez di Enseñanza pa Empleo y otro institutonan cu por coopera.
ATI den cooperacion di cu, por ehemplo, Enseñansa di Empleo, pa fortifica e institutonan cu ta train, cu ta prepara nos hobennan, nos hendenan desemplea, pa nan asumi otro tipo di actitud: e importancia di cumpli cu un horario di trabao, e disciplina di trabao, tambe e realidad cu tin hopi trabao cu no ta simplemente un trabao di dialuna pa diabierna, pero e punto ta, cu si ta prefera di keda cas cu haya un trabao, unda cu lo mester traha un diasabra, of un diadomingo.
Di otro banda, mester prepara pa e doñonan di trabao tin un schedule balansa, pa e mama of tata di famia, no wordo sacrifica, pero pa tin tempo pa dedica na famia y yiunan. E ekilibrio aki ta e gran reto y esaki ta su responsabilidad, segun e mandatario.
Kiermen, pa e desempleadonan por haya training pa por subi mercado laboral local, a base di demandanan cu dunadonan di trabao tin, como tambe e mercado laboral y nos economia. Y alavez, como minister di Asuntonan Social y di Labor, pa sigura cu toch e regimen laboral ta duna e trahado, e dianan liber suficiente, cu e mester por, como mama of tata di famia, pa dedica na nan famia.
Esaki ta un tema compleho, tin hopi hende cu kier traha, pero e pregunta ta: “Na unda ta laga e yiunan?” Si tin caminda pa laga e yiunan, pregunta ta keda si nan por paga esaki. Transporte awendia, pa un hende cu ta biba na San Nicolas pa bay trabao y bin bek, ta papia aki di mas di 600 florin na gastonan di transporte so pa dia. Y na crèche, kico ta resta pa cria famia?
E mandatario a sigui bisa cu mester atende henter e pakete aki como uno so, y tambe e ahuste/aumento di salario minimo. E ahuste di canasta basico, reduccion di tur e factornan cu ta afecta costo di bida, manera awa, coriente, cas. Ta p’esey ta importante cu e minister presidente, cu ta alavez minister di energia ta haciendo pa baha prijs di awa y coriente. Ta importante tambe decisionnan riba tereno di construccion di mas casnan social.
E asunto aki mester wordo atendi como un pakete, hunto cu e minister di educacion pa sigura cu por tin e training, educacion, muchanan cu caba EPB, EPI cu dado momento, cu nan lo mester di un training extra pa nan por fit den e mercado laboral.
Tin mas di cinco mil hende sin trabao y toch tin hende tin necesidad pa trece trahado di afo. Obviamente e ta un señal cu e demanda di desaroyo cu e creacion di cupo di trabao, ta mas hopi cu loke tin. Pero e mal señal cu e gobierno a haya ta cu e desempleo ta sigui subi. Brinda oportunidad di trabao na nos hendenan, y no solamente brinda nan un cupo di trabao, pero ta importante pa nan por haci e trabao tambe. Y eynan ta e tarea di prepara nan di un forma apto y loke no tin ariba mercado laboral, trece nan di afo.
Pa cada trahado di afo, pone un hende local banda di dje, e mandatario a bisa. No ta bay tranca e proceso tampoco, pero ta pidi pa tin transferencia di conocemento, pone local pa cana cun’e for di e propio organizacion.
Ta trahando riba un proyecto piloto, bou di mamanan soltero. Cada hoben su situacion ta diferente. mamanan soltero su situacion ta otro. Tambe tin hendenan cu mas cu ta pasando 40 y 50, tambe tin un buraco unda cu nan ta kedando sin trabao. Den e proyecto piloto nan ta analizando e problema y wak kico gobierno di su banda, cu cooperacion di comercio y sindicato, por haci pa sigura, di forma efectivo, pa nos hendenan cu ta desemplea por bin na remarca cu e trabaonan cu ta disponibel na Aruba, e mandatario a conclui.
FUENTE: https://www.diario.aw
