lunes, 31 de agosto de 2020

(Aruba) Plan macabro ta culmina den mundo medico

“Criminalnan ta activo na e centro di operacion medico di Aruba.” Esaki ta e informacion cu Aruba mester ricibi na momento cu un plan macabro ta culmina, segun expertonan cu ta informante di DIARIO.

For di momento cu e proyecto sumamente caro di Hospital a cuminsa como parti di e proyecto Bo Aruba, tin hopi duda no solamente riba e placa cu a wordo gasta pero tambe cu a ekipa, a pone instalacionnan y hasta a atrae personal.

Importante ta, cu ora investiga e personanan ta topa te cu 2017 cu personanan cu directamente tabata mara na politica y hospital.

Durante ultimo dos aña, Hospital tabata escenario di asuntonan serio cu directamente ta mustra cu den Hospital mester papia di spionahe directo cu ta posibel dor di personanan cu por actua y por perhudica hospital, gobernacion y den e caso di Covid-19, directamente e bienestar di Aruba.

DIARIO a base di reglanan internacional pa organisacion y maneho di Hospital, a lanta para na 2019, ora AZV a bin descubri cu den e laboratorio di hospital tabata tin estafa cu bida di hende.

Testnan pa determina si pashentnan por tin cancer na matriz a wordo uza pa un of mas criminal gana placa cu un negoshi sushi cu a pone na peliger e bida di tur e personanan cu a haci e test cu no por a produci resultado.

Aki pues ta papia di un acto criminal serio, cu a hiba na suspension di e dirigente di laboratorio cu durante gobernacion anterior a wordo poni na trabou.

DIARIO tabata pendiente pa publicacion di e rapport interno di Hospital cu mester a habri caminda pa persecucion criminal den e caso aki mientras un batayon di abogado a prepara nan mes di parti di e culpabel y otro envolvi.

E caso nunca a mira luz, pasobra mannan invisibel a uza un of otro computer den e mundo medico di Aruba pa destrui henter e sistema central di pashent di Aruba.

Den e sistema aki tur entidad medico y dokter ta nota problemanan di un pashent cu nan ta atende.

No por papia aki di un coincidencia, pasobra un persona of otro mester a habri e mensahe cu a habri e porta pa destrui e sistema di informacion di hospital cu a wordo cumpra a base di e proyecto Bo Aruba como parti di ekipo centralisa pa funcionamento di salud na Aruba.

Informantenan ta mustra con Aruba a wordo perhudica atrobe y bida di hende poni na peliger mientras e investigacion di e caso criminal den laboratorio a keda secreto.

Covid-19 a presenta. Aruba mester a actua den union cu henter mundo, DIARIO ta haci uzo di e sistema cu ta produci cifranan oficial di Aruba continuamente como parti di e exigencianan internacional na cual Gobierno di Aruba y henter e crisis team mester tene su mes.

Tur informacion medico a base di Covid-19 ta wordo centralisa den un data bank, cu ta e punto di salida. E informacion aki ta punto di principio, un base cu ta wordo uza despues cu na diferente forma cada instancia repasa e informacionnan y sigui atende cu nan.

Pa atende cu e informacionnan aki un persona mester ta capaz pa analisa e informacionnan, mester con e ta wordo ahusta tur caminda y sigui traha.

Gobierno no ta ricibi informacion medico di pashent pero un lista cu ta wordo prepara.

Un acto criminal a tuma luga y den fin di siman atrobe spionnan tras di un plan macabro a actua. Informacion sin ningun investigacion periodistico responsabel, a drenta comunidad caminda tur hende a haya oportunidad di yega na conclusion, sin informacion exacto loke ta causa un turbulencia total na Aruba.

Expertonan a mustra DIARIO cu autoridad mester actua rapidamente y awor mester determina con atrobe tin mannan scondi cu por destrui siguridad di e sistema di computer cu ta e central di informacion di Aruba.

Ta papia aki di cowboynan cu ta uza publicidad na forma destructivo sin ningun preparacion pa atende cu materia criminal cu ta prueba den e investigacionnan actual di Husticia na Aruba pa descubri e mannan scondi den crimennan na hospital.

Loke a wordo publica den Facebook ta prueba di crimen bou investigacion di Husticia manera expertonan ta mustra y mester wordo considera un arma produci dor di spionahe pa ataca bienestar di Aruba.

 

LO + Leído...