(Aruba) Caso di aparente negoshi cu organo di pacient Arubano fayeci den clinica na Colombia!

ORANJESTAD (AAN) – E caso aki ta uno hopi delicado, cu DIARIO a wanta e informacion, pendiente di un entrevista cu un familiar di e pacient, cu a dicidi di no bin mas, y aunke nos ta respeta su motibonan, nos deber ta alerta tanto AZV como resto di comunidad, pasobra un denuncia formal ta na su lugar.
Pesey tambe nos ta reserva pa nos e fuente di informacion, aunke nos a acerca AZV pa haya sa si nan tin un idea cu cosnan asina por ta pasando cu pacientnan cu ta wordo manda pa tratamento na un clinica na Colombia, y cu ta fayece aya.
AZV no tin indicacion di esaki y nos, cu locual e instancia ta di acuerdo tambe, kier haci un yamada si tin mas hende cu a pasa den algo similar, pone denuncia na AZV mes.
COMERCIO DI ORGANO?
Nos fuente di informacion, un persona ayega na DIARIO, a relata pa nos tocante un dama cu despues di cierto operacion realiza na Aruba, el a complica y mirando cu e caso tabata complica cu no por a sigui yude na Aruba, e docter a referi e caso na AZV pa mande Colombia, locual a sosode tambe.
Ora e pacient a yega Colombia e docternan aya a bisa su familiarnan cu ta hopi laat, y a puntra di con nan a manda e pacient asina laat. Pa no identifica e caso, ya cu e familiar di e pacient no a presenta pe entrevista, DIARIO no ta relata riba e malesa ni e diagnostico di cual el a fayece, y ta un lastima pasobra e caso ta mustra uno di negligencia medico na Aruba tambe.
E pacient a fayece na e di tres dia cu el a wordo hospitaliza na Colombia y logicamente, su famia ta den trauma te ainda. Ora e dama tabata den su ultimo momentonan su casa a mira door di un glas kico nan tabata haciendo cune, y despues e docter a bay pafo bise cu nan a haci tur loke nan tabata por pa su señora pero no por a haci nada mas debi cu el a haya daño cerebral.
Despues dos enfermera a bay cu e curpa di e señora den un camber y nan a bisa su casa cu ora nan keda cla, nan ta yame pa e pasa wak e dama. Segun nos fuente di informacion na momento cu e meneer a wak su casa e tabata tin su wowonan habri ainda, pero e sorpresa di mas grandi y mas tristo cu a pone den shock, y ainda e no ta recupera, ta ora el a hisa e paña di su casa, y a ripara cu tur su curpa ta corta.
Despues el a bin haya sa cu nan a despoha su señora di e organonan di su curpa cu ainda tabata vital. Esaki a sosode sin permiso di e señora su casa. El a haci e pregunta nan a bise cu nan mester a saca e organonan di su casa, pasobra mester transporta e curpa y no por haci esaki cu organonan den dje!
CAHA, MAKE UP Y PAÑA:
Nos fuente di informacion a sigui conta nos cu e casa di e señora a bisa e enfermeranan cu e ruman di e dama ta biniendo Colombia pa compañe y pa nan bin Aruba back cu e curpa.
E ora ey nan a bise cu nan mester regla cu un funeraria anto y el a bisa nan cu no, pasobra na Aruba e ta bay na un funeraria. Pero nan a insisti y pone e meneer firma papelnan y scoge un caha.
Nan a pone scoge e caha y un paña pe, nan a makiya e señora, pega pestaña. Ora e ruman a yega el a wak e dama den e caha, el a haya masha rabia mes pa e forma con nan peina e señora, con nan a bistie, y pasobra el a hole cu ta negoshi nan tin. Hasta nan a pidi un propina pa e señora cu a makiya y “drecha” e curpa di e dama.
NI CAHA, NI PESTAÑA, NI PAÑA:
Tur e tramitacionnan pa transporta e curpa di e dama pa Aruba a tuma lugar, y un amiga di e famia biba na Colombia a pone un ramo di rose den e caha. Pero atrobe e famia a wordo mal sorprendi ora e curpa a yega Aruba: den otro caha, sin pestaña (ta e lijm nan mester a kita den e funeraria akinan), sin e paña y sin e ramo di rose.
DEN CONTACTO CU AZV:
Den contacto masha cortico cu AZV ta dos conclusion nos tin: uno cu nan no ta na haltura di e caso aki, ni otronan cu por a tuma lugar. Cu na Colombia docternan mag, segun ley, saca e organonan cu ainda ta vital for di un curpa sin bida, pero cu e contrato cu AZV cu pacientnan di Aruba ta exclui e posibilidad aki, y cu AZV ta pidi pa haci denuncia di e caso aki formalmente, pa nan tuma e pasonan cu mester tuma y pa cosnan asina no bolbe sosode.

FUENTE: http://www.diario.aw/2011/08/caso-di-aparente-negoshi-cu-organo-di-pacient-arubano-fayeci-den-clinica-na-colombia/