Miéntras tantu tur polítikonan na Hulanda, Parlamentario i Partidonan a risibí un mail inkluyendo e link i kendenan a reakshoná hopi positivo. Tambe esnan lokal ku a lesa e buki a keda kosterná ku uno no por mira e bèrdat loke bo por lesa awó skirbí pretu riba blanko. Lamentablemente tambe tin hendenan ku ya tin nan opinion mirando e título i parse sa mihó loke ta skirbí (òf no skirbí) den e buki. Lubidando ku e buki aki mester funshoná komo un ‘eye opener’ pa nos ku ta siudadano.
Desde 1982 nos ta biba aki i ta aktivo pa e isla aki. Luchando kontra sufrimentu di mucha nos no por logra di yega na algu. Korupshon parse ta algu normal akinan. Despues ku nos a lanta MKK (Movementu Kontra Korupshon) nos a haña hopi informashon. Un mas pió ku otro. Na dado momentu esnan ku a traha huntu ku nos a yega na e siguiente konklushon; John, sufrimentu di mucha i korupshon ta ser mantené aki i no mag di ta ser solushoná. Tòg nos a sigui te ora diripiente un persona a alehá su mes. E motibu tabata; Kosnan ta birando peligroso i kada bes nos ta dal den un mafia. Nos a hari keriendo ku e tabatin mal beis. Sinembargo despues di tempu i despues di algun evaluashon a bin sali na kla ku e persona aki tabatin rason. Ta bèrdat ku polítika ta bai pareu ku korupshon. Hendenan ku bon posishon semper ta ser protehá. Nos a disidí di kompilá tur e informashonnan i sigurá esakinan mundial. Pa mas despues a pidi mi pa skirbi un buki i laga e hendenan huzga pa nan mes kiko ta andando akinan. Ta bo ta disidí kiko bo kier kere y kiko bo ta mira. Despues di a koba tantu aña den e berpùt a bin sali na kla ku kosnan no tin mag di kambia riba e isla aki i esaki pa bienestar di e mafia.
FUENTE: http://www.24ora.com
