“Polis di Aruba kier tapa un grave eror dañando nomber di mi yiu”

ORANJESTAD (AAN): Siguiendo cu e noticianan relaciona cu e caso di e dos homber colombiano cu a muri siman pasa durante un accion policial, durante un entrevista cu e corant El Informador di Santa Marta, e tata di Benjamin Castro, un di e fayecidonan, el a bisa cu polis di Aruba kier tapa e eror cu a ser cometi pero manchando e nomber di Benjamin Castro y Alcides Peralta.
E tata a sali na defensa di su yiu bisando cu Benjamin di 35 aña tabata traha den construccion y tabata realiza diferente labor.
A enfatiza cu nan ta exigi pa e asunto aki wordo aclarea. A señala cu su yiu for di aña y mey pasa a sali for di San Martin, bario unda e tabata biba na Santa Marta, pa acepta un invitacion di un amigo y purba suerte na Aruba, na unda el a cuminza un relaciona cu Johaina y na unda e tabata traha den diferente ofishi.

For di Aruba e tabata tin contacto cu su mayornan y den diferente occasion e tabata manda placa den cantidadnan chikito, ya cu loke e tabata gana no tabata hopi, a señala.

Banda di esaki e mama, Rosario Aguirre, a laga sa cu e dia ey, el a papia cu Benjamin banda di 10:30 di mainta y cu Benjamin a bise cu e tabata cu un amigo cumprando paña na un mall. Atardi nan a ricibi e noticia di su morto, hecho cu ainda nan no ta asimila.

E mayornan di Castro ta exigi husticia y un version real di e sucedido y pa e responsablenan paga pa e morto di nan yiu. E version cu nan tin ta cu den e auto no a haya arma, tampoco droga. Pakico e ora polis a mata nan yiu?, a puntra.

Awe e restonan di Benjamin Castro lo wordo repatria pa Santa Marta pa despues wordo dera na San Miguel. DIARIO no a haya confirmacion si e curpa di Alcides Peralta tambe lo ser manda bek pa su pais tambe awe.

FUENTE: http://www.diario.aw