E negosacionnan intensivo PetroChina tabatin cu tanto gobierno di Aruba como Valero ta sigui den entre otro intercambio di documentonan y aki no mucho tempo un decision final ta cay. Cosnan ta mustra positivo pa Aruba.
E hecho cu Venezuela ta geograficamente cerca di Aruba ta hungando un rol den e interes cu PetroChina a demonstra pa Aruba. Esaki ta e pensamento di Prome Minister Eman.
“PetroChina sigur ta mira e refineria aki manera cu Exxon a mir’e casi shen aña pasa. Ora cu e tempo ey nan a bin Aruba nan a nota cu na Venezuela tin un proceso canando di exploracion di crudo y cu mester aumenta e capacidad di rafina e crudo. Awe e realidad ey no ta otro. Venezuela ta sigui crece den exploracion di crudo y e capacidad den becindario di procesonan di refina tambe ta crece.
Si esakinan worde acopla na loke ta sosodiendo na Venezuela anto esaki ta crea un mercado hopi factibel pa un refineria pa un tempo hopi largo. Nos conoce e bon relacionnan cu PetroChina tin cu PDVSA y esey sin duda ta hungando un rol tambe den nan interes pa e refineria na Aruba”.
Pa loke ta e relacion di gobierno cu Valero durante e proceso di negosacion aki Prome Minister Eman a remarca cu Valero ta aprecia enormemente e forma pro-activo con gobierno di Aruba a demonstra den busca un solucion pa e situacion.
Continuamente sr. Bill Klessy den nomber tambe di otro ehecutivonan ta expresa palabranan di gratitud y aprecio pa e forma diligente y profesional cu gobierno a asumi su responsabilidad pa atende cu e situacion aki. “Naturalmente na prome instante pa e pueblo di Aruba, pa e trahadornan, pero tambe den un forma hopi social pa cu e sentimentonan cu Valero a demostra pa Aruba y su empleadonan.
Nos tambe a demostra un solidaridad pa locual e empresa aki a nifica durante e añanan na Aruba. Na diferente occasion, ora cu Valero no tabata den operacion, e refineria por a laga e trahadornan bay, pero a scohe pa sigui paga nan.
For di e sentido di aprecio ey di Aruba pa Valero, nos di nos banda a haci esfuersonan hopi grandi pa por a crea bentanan di oportunidad pa por yega na un cumprado y crea e circumstancianan pa e cumprado sinti cu gobierno di Aruba no ta un obstaculo pa realisa un transicion.
Valero di su banda ta trahando den un forma hopi constructivo pa nan realisa e benta, loke ta nan deseo, pero tambe Valero tin un sentimento special pa e proceso aki termina den un bon forma pa Aruba. Nan tin mixed feelings, pasobra si no tabata pa e margennan cu no tabata factibel, Valero lo a continua cu su operacion na Aruba, pasobra nan ta hopi contento cu e forma cu nan a worde trata door di e gobierno aki”.
FUENTE: http://www.diario.aw
