(Aruba) Atraco Team a detene atracador Venezolano den cas di pueblo na Tarabana

ORANJESTAD (AAN) Diabierna atardi lat bisiñanan di Macubaristraat a keda sorprendi pa wak Polis un biaha mas ta bishita nan caya. Riba e ultimo siman di Mey Atraco Team a piki un mama y su yiu Venezolano cu a dicidi cu nan ta bin Aruba y comete crimennan serio. Polis a keda falta un sospechoso pero diabierna su number a hunga.
Mescos cu biaha pasa Polis a rondona e cas. Varios recherche di y otro agentenan tabata tin e area rond di cas bon vigila.

Un rato despues hunto cu dos agente a sali pafor Richard Albany Morales Vivas deteni pa sospechoso di a comete varios atraco rond di nos isla. Mescos cu e duo deteni den Mei e homber ta di nacionalidad Venezolano. Atraco Team a keda algun ora den e cas pa realisa nan investigacion y bandona despues cu cahanan di evidencia.

Ta di lamenta cu atrobe doño di e cas di FCCA aki na Macubaristraat ta huur un dak na stranheronan cu ta bin Aruba pa bay den baho mundo. E hecho aki ta hiba nos na e scenario cu tin un negoshi basta lucrativo andando den e casnan aki, den cual ta huur camber cu hende. Den e mesun address aki Polis a captura tres sospechoso caba den apenas algun luna. A yega ora pa instancianan concerni tira un bista rib’e asunto aki.

FUENTE: http://www.diario.aw