Iniciador refineria Coastal Aruba Oscar Wyatt jr. ta haya caya na su nomber

ORANJESTAD(AAN): Diadomingo atardi el a yega Aruba riba un avion priva. Prome minister Mike Eman tabata tey pa ricibi Oscar Wyatt Jr. Dialuna dia 28 di januari, pa 5’or di atardi ta bay tin un ceremonia pa honra iniciado di refineria Coastal na Aruba, sr.Oscar Wyatt jr., cu un caya na su nomber.
E ceremonia ta tuma luga dilanti di ex-edificio di DIMAS na San Nicolas. E caya cu ta core banda di e muraya di e refineria te Zeewijk ta haya e nomber Caya Oscar Wyatt jr.

Sr. Wyatt su trabaonan cu Aruba a percura pa un refineria cu tabata un competidor fuerte mundialmente den añanan 90.

E inversionnan di e compania cu el a funda na aña 1955 a sigura reapertura di refineria tempo di Gabinete Oduber na 1991. Despues durante Gabinete di Henny Eman, trahando hunto cu Coastal a percura pa un Tax Holiday.

E ultimo aki tabata pa un inversion di e inversionnan di mas importante cu e refineria a haya despues di ciere di LAGO. E inversion aki a haci e refineria uno competitivo un biaha mas. E inversion tabata inclui dos ‘delay coker’ (balora na mas di 250 miyon Dollar) cu a haci e refineria financieramente factibel y economicamente competitivo riba mercado internacional di productonan di petroleo.

Apertura di Coastal na Aruba a percura pa centenares di cupo di trabao, tanto directamente y indirectamente e tempo ey. Sr. Wyatt ta considera un persona cu un curashi grandi cu awe ta keda honra cu un caya na su nomber.
Oscar Sherman Wyatt, Jr. a nace na Beaumont, Texas.

Na e edad hoben di solamente 16 aña el a haya su licencia pa bula avion. El a atende Texas A & M University, pero a bandona esaki pa drenta servicio militar como un piloto di combate. Na e edad di solamente 21 aña Oscar Wyatt a worde condecora como un piloto di Segunda Guera Mundial.

Despues di guera el a sigui studia y a haya su degree den Mechanical Engineering. Na 1950 Wyatt a cuminsa cu e negoshi di energia y a financia e ‘Hardly Able Oil Company’ e compania cu despues a bira Coastal Oil and Gas Company. Un compania cu a crece y bira grandi danki na e vision y liderazgo di sr. Oscar Wyatt jr.

Na 1997 sr. Wyatt a retira como presidente di e compania, pero a keda como presidente ehecutivo te na januari di 2001 ora a bende Coastal cu El Paso Natural Gas Company.

Oscar Wyatt semper tabatin atencion pa hende y nan bienestar y ta dedica tambe na yuda den avance di investigacionnan biomedico. Semper su pasion pa bula a keda y awor e ta den e Board of Stewards di Texas Aviation Hall of Fame. Oscar Wyatt y su casa Lynn ta hendenan masha generoso y a duna hopi na institucionnan caritativo rond mundo, incluyendo Medi conan sin Frontera, Princess Grace Foundation, Houston Grand Opera, Houston Ballet, Star of Hope Mission, Methodist Hospital, M. D. Anderson Hospital y St. Luke’s Hospital. Sr.Oscar Wyatt y su señora Lynn tin cuatro yiu homber y dos nieto. Henter Aruba ta keda invita pa atende e ceremonia awe tardi banda di ex edificio di DIMAS na San Nicolas.

Un persona cu danki na su curashi y liderazgo a percura pa un desaroyo positivo pa Aruba y su hendenan

Original en inglés: http://www.diario.aw/2013/01/iniciador-refineria-coastal-aruba-oscar-wyatt-jr-ta-haya-caya-na-su-nomber/ Traducido por Google