John F. Kennedy School ta bay wordo restaura dor di Gabinete Mike Eman y SOGA (Stichting Onroerend Goed Aruba) pa bira sede entre otro di departamentonan cu ta cay bou di Ministerio di Enseñansa.
Den combersacion cu un di e ex directornan di e instituto educativo aki, Paul van Niel, el a bisa cu e ta contento di por a siña e “mala muchanan cu ta wordo manda pa nan” disciplina. Disciplina den klas tabata siña e muchanan pa cambia nan sistema.
“E scol a hunga un rol importante den bida di hopi mucha, awendia adulto. Unda cu mi bay – WEB, ELMAR – ta topa cu ex studiantenan. Aunke mayoria ta bay cu pensioen. Pero antes unda cu bo bay, ta topa cu un ex studiante di John F. Kennedy School.
Pesey orguyoso nos ta di loke e John F. Kennedy School a haci pa e muchanan.” Na momento cu van Niel tabata dunando un entrevista, un ex studiante a pasa den auto dilanti e edificio, y a grita “Nos scol ta bay wordo renoba porfin”, ilustrando cuanto recuerdo y amor e ex studiantenan tin pa e tempo cu nan a pasa na John F. Kennedy School.
E ex director ta corda cu antes e klasnan tabata grandi. Nan tabatin casi 40 klas di 30 studiante pa cada klas cu un cuerpo di 60 docente. E edificio tabata di dos piso y na final mester a construi barak extra pa por acapara tur e studiantenan cu nan tabata haya. E scol tabata conta cu 6 werkplaats pa e parti practico di e lesnan. Carpinteria, Bankwerken (Lasssen ta inclui den dje), schilderen, etc., ta algun di e ofishinan cu tabata wordo siña na e scol.
Van Niel a splica cu aunke e scol den boca di pueblo tabata wordo yama e scol “mal muchanan”, esaki en realidad no tabata e caso. E por corda varios persona cu a bay e scol aki y a ocupa funcion halto den companianan na Aruba. Un di nan cu e ta corda mesora ta ing. Metlon Arrindell, kende tabata Hoofd Ingenieur na WEB y awor ta cu pensioen.
Aunke cu John F. Kennedy tabata conoci como un scol tecnico, unda e mucha hombernan tabata bay siña un ofishi, na final di decada 80, ora cu van Niel tabata director caba, a cuminsa tuma mucha muhe na scol. “E proceso aki a bay hopi bon y no a causa ningun problema,” e ex director a indica.
John F. Kennedy a wordo estableci mey-mey di añanan 50 Arubaanse Technische School, A.T.S. y A haya acerca U.T.S. y den decada 60 a bira John F. Kennedy school y a cera su portanan den e prome parti di decada 1990. “E ta nice di por mira esaki. Ta miles y miles di mucha a pasa den e scol aki. Pesey el a duel mi masha hopi cu e scol a wordo laga asina.”
| FUENTE: http://www.diario.aw |
